Žalmi 102 - Le Devleskero Lav Andre Romaňi Čhib Slovensko 2021

O Žalmos 102

¹ E modľitba le strapimen manušeskri, sar hino andro pharipen a phenel le RAJESKE, so les dukhal.

² RAJEJA, šun avri miri modľitba; mi džal miro mangipen ke tute!

³ Ma garuv tiro muj angle ma, sar som andro pharipen! Visar tiro kan ke ma; sar ke tu vičinav, sig mange odphen!

⁴ Se mire dživesa našľon sar thuv; o kokala mange labon sar angara.

⁵ Miro jilo hino avrišuko sar e šuki čar; bisterav imar te chal the o maro.

⁶ La dukhatar, so ajci rovav, šučiľom avri pro kokalos.

⁷ Dičhuvav avri sar e sova pre pušťa; sar o kuvikos pro rozburimen thana.

⁸ Na sovav ňič, som sar čiriklo korkoro pro pados.

⁹ Calo džives mange mire ňeprijaťeľa keren ladž; ola, ko mandar asan, len miro nav paš o košiben.

¹⁰ Se o prachos andral o bov chav sar o maro, o pijiben mange mišinav le apsenca

¹¹ angle tiri bari choľi, bo tu man hazdľal a čhiďal het.

¹² Mire dživesa našľon sar račakro ciňos; šučuvav avri sar čar.

¹³ Ale tu, RAJEJA, bešes pro tronos pro furt, pre tute pes na bisterela andre ňisavo pokoleňje.

¹⁴ Tu ušťeha upre a ela tuke pharo vaš o Sion, bo avľa e ora te presikavel leske o lačhipen, akana hin odi ora.

¹⁵ Tire služobňika radisaľon le Sionoskre barenge a igen len dukhal, hoj hino sa andro prachos.

¹⁶ O narodi pes darana le RAJESKRE navestar; savore kraľa pre phuv pes darana tira slavatar,

¹⁷ bo o RAJ pale ačhavela o Sion a sikavela pes andre peskri slava.

¹⁸ Šunela e modľitba peskre čore manušengri a odphenela lenge pro mangipen.

¹⁹ Kada pes mi pisinel prekal o pokoleňje, savo avela; hoj o manuša, save mek na uľile, te lašaren le RAJES:

²⁰ „O RAJ andral peskro sveto than dikhľa tele, andral o ňebos dikhelas pre phuv,

²¹ hoj te šunel o roviben andral e bertena, a te zachraňinel olen, ko sas odsudzimen pro meriben.“

²² Vašoda pes vakerela pal o nav le RAJESKRO pro verchos Sion a dela pes leske e chvala andro Jeruzalem,

²³ sar pes zdžana o narodi the o kraľišagi, hoj te lašaren le RAJES.

²⁴ Slabisarďa miro dživipen pro jepaš drom, a cikňarďa mire dživesa.

²⁵ Avke phenav: „Devla miro, ma le man het andre mire nekfeder berša! Tire berša predžan pal jekh pokoleňje pre aver,

²⁶ imar čirla stvorinďal e phuv a tire vastenca kerďal o ňebos.

²⁷ On našľona a rozperena sar o uraviben, ale tu ačheha furt; čerineha len sar o gada a našľona.

²⁸ Ale tu sal furt jekh a tire berša šoha na preačhena.

²⁹ O čhave tire služobňikoskre dživena andro smirom a lengre čhave ačhena zorales paš tute.“