Žalmi 101 - Le Devleskero Lav Andre Romaňi Čhib Slovensko 2021

O Žalmos 101

1 Le Davidoskro žalmos.

¹ Le Davidoskro žalmos. Pal tiro kamiben the spravodľišagos kamav te giľavel, tut kamav te lašarel, RAJEJA!

² Dav mange pozoris, hoj te phirav pal o dokonalo drom. Kana aveha ke ma? Andre miro kher dživava žuže jileha.

³ Na dikhava le jakhenca pre ňisavo nalačhipen. Našťi avri ačhav oda, so keren ola, ko pes visaren le Devlestar. Na ela man lenca ňič!

⁴ Mi aven dur o previsarde veci mire jilestar; pal o nalačho na kamav aňi te džanel.

⁵ Ko počoral vakerel namištes pal aver dženo, oleske phandava o muj. Kas hin barikane jakha a ko pes ľidžal upre, oles paš ma na zľidžava.

⁶ Mire jakha dikhena pro verna pre phuv a domukava lenge te bešel manca. Ko phirel žužes, oda mange služinela.

⁷ Andre miro kher na bešela ňiko, ko avrenca thovel avri; paš ma na obačhela ňisavo klamaris.

⁸ Sako tosara ňičinava savore nalačhe manušen andre phuv. Tradava avri savoren, ko keren o nalačhipen, andral o foros le RAJESKRO.