Prislovja 7 - Le Devleskero Lav Andre Romaňi Čhib Slovensko 2021

¹ Čhavo miro, ľiker tut mire lavendar a mire prikazaňja doľiker!

² Šun mire prikazi a dživeha. Chraňin tuke miro sikaviben sar tiri jakh!

³ Phand len tuke pro angušta; pisin len pre tabla tire jileskri!

⁴ Phen la goďake: „Tu sal miri pheň,“ a le achaľuvipnaske: „Tu sal miri famelija.“

⁵ Ochraňinena tut la avra džuvľatar, lakre gule lavendar.

E nalačhi džuvľi

⁶ Jekhvar dikhavas andral miro kher a prekal e oblaka dikhľom

⁷ terne nagoďaver muršen a sas maškar lende jekh ajso, savo našaďa e goďi.

⁸ Ov peske džalas la uľicaha dži pro agor, phirelas le dromeha pašal lakro kher

⁹ rači, sar o kham zadžalas, sar imar avelas e kaľi rat.

¹⁰ Jekhvareste angle leste avľa odi džuvľi le budžande gondoľišagoha, urďi andro lubikane gada.

¹¹ Kerelas vika a sas bi e ladž, šoha na ačhelas but khere.

¹² Jekhvar sas pre uľica a jekhvar maškar o foros, pre dojekh rohos užarelas pre varekaste.

¹³ Obchudňa le terne muršes, čumidľa les a bi e ladž leske phenďa:

¹⁴ „Adadžives doľikerďom mire lava, so diňom, a mek mange ačhiľa mas pal e smiromoskri obeta.

¹⁵ Vašoda avľom avri, hoj tut te arakhav; igen rodavas a arakhľom tut.

¹⁶ Učharďom miro hadžos le lepedenca, le šukar pochtanenca andral o Egipt.

¹⁷ Kerďom, hoj miro hadžos te voňinel pal e mirha, pal o aloe the pal e škorica.

¹⁸ Av, mačaras pes le kamibnaha dži tosara, uživinas peske o kamiben.

¹⁹ Miro rom nane khere, geľa pro baro drom.

²⁰ Iľa peha but love a na avela khere, medik na ela o čhonoro calo.“

²¹ Pricirdňa les peskre vakeribnaha, zachudňa les peskre gule lavenca.

²² Jekhvareste džalas pal late sar o bikos, saves džan te murdarel; sar o jeleňis, so pes chudel andre pasca,

²³ saveske o šipos predžal prekal o per; sar o čiriklo, so ľecinel andre sita a na džanel, hoj leske džal pal o dživipen.

²⁴ Čhavo miro, akana man šun a de pozoris pro lava mire mujeskre:

²⁵ Tiro jilo te na džal pre lakre droma, ma phir pal lakre chodňiki.

²⁶ Angle late sas but murša dukhade pro meriben; murdarde sas ajci džene, hoj pes aňi na del te zgenel.

²⁷ Lakro kher ľidžal andro than le mulengro; ko džala andre, merela.