Prislovja 4 - Le Devleskero Lav Andre Romaňi Čhib Slovensko 2021

Le dadeskro dovakeriben

¹ Čhave mire, šunen le dadeskro sikaviben; te dena pozoris, achaľuvena, so hin goďaver.

² Oda, so tumen me sikavav, hin lačho, vašoda ma omuken oda.

³ The me somas cikno čhavoro le dadeskro, ča jekhoro mira dakro,

⁴ miro dad man sikavelas a phenďa: „Ľiker mire lava andro jilo, doľiker mire prikazi a dživeha.

⁵ Dochude o goďaveripen the o achaľuvipen! Ma bister pre mire lava a ma visar tut olestar, so vakerav.

⁶ Ma muk o goďaveripen a chraňinela tut, kam les a stražinela tut.

⁷ Ešebno goďaveripen, so šaj keres, hin kada: Dochude o goďaveripen a cin tuke o achaľuvipen vaš savoro, so tut hin.

⁸ Kam o goďaveripen a kerela tutar baro, obchude les a dela tut pačiv.

⁹ Thovela tuke pro šero o šukar vencos a dela tut e vzacno koruna.“

¹⁰ Šun man, čhavo miro, prile mire lava a dživeha but berš.

¹¹ Me tuke sikaďom o goďaveripnaskro drom a ľigenďom tut le čačipnaskre chodňikenca.

¹² Sar phireha, na zaačhavela tut ňič; te denašeha, na poddžala tuke o pindro.

¹³ Chude tut zorales mire sikavibnastar, ma domuk les te džal het, stražin tuke les, bo hino tiro dživipen.

¹⁴ Ma dža pro chodňikos le bijedevleskre manušengro a ma phir pal o drom le nalačhe manušengro.

¹⁵ Obdža oda drom a ma phir odarik, visar tut a dža avre dromeha.

¹⁶ Bo on na džana te sovel, te na kerena o nalačhipen, našťi zasovena, medik varekaske na podthovena o pindre.

¹⁷ O bijedevleskeriben hin lenge sar o maro a o mariben sar e mol.

¹⁸ O chodňikos le čačipnaskerengro hino sar o tosaraskro kham, so švicinel zoraleder the zoraleder medik nane o džives.

¹⁹ O chodňikos le bijedevleskerengro hin sar baro kaľipen, a vašoda na džanen, pre soste šaj peren.

²⁰ Čhavo miro, de pozoris pre mire lava a šun mištes, so tuke vakerav!

²¹ Ľiker tuke len anglo jakha a garuv len andro jilo.

²² Kala lava hine o dživipen olenge, ko len arakhen, a hine pro sasťipen cale lengre ťeloske.

²³ Nekbuter savorestar tuke chraňin tiro jilo, bo lestar avel o dživipen.

²⁴ Le avri o klamišagos andral tiro muj a de tutar het o vušta, so na vakeren o čačipen.

²⁵ Tire jakha mi dikhen anglal peste a te na dikhen avrether pre sera.

²⁶ Rovňin avri o chodňikos tire pindrenge a savore tire droma ena zorale.

²⁷ Ma dža pre čači aňi pre baľogňi sera a ma uštar tire pindreha andro nalačhipen.