Prislovja 2 - Le Devleskero Lav Andre Romaňi Čhib Slovensko 2021

So anel o goďaveripen

¹ Čhavo miro, te prileha mire lava, a doľikeraha, so tuke prikazinav,

² te šuneha oda, so hin goďaver, a kameha oleske te achaľol,

³ te tuke mangeha o goďaveripen a te zorales vičineha, hoj te achaľos,

⁴ te oda rodeha avke sar o rup a kameha oda te arakhel avke sar o garudo barvaľipen,

⁵ akor achaľoha, so hin e sveto dar le RAJESTAR, a arakheha o prindžaripen pal o Del.

⁶ Bo o RAJ del e goďi a andral leskro muj avel o goďaveripen the o prindžaripen.

⁷ Ov pomožinel olenge, ko hine čačipnaskre, a chraňinel olen, ko dživen žužes;

⁸ ov stražinel olen, ko pes ľikeren mištes ke aver džene, a dodikhel pre ola, ko leske hine verna.

⁹ Akor achaľoha, so hin lačho, čačipnaskro a spravno; džaneha, sar kampel te dživel,

¹⁰ bo o goďaveripen tuke džala andro jilo a o prindžaripen tuke anela o radišagos pre duša.

¹¹ O spravno gondoľišagos pre tu dela pozoris a o achaľuvipen tut stražinela;

¹² ochraňinela tut, hoj te na džas pro nalačhe droma a hoj te na pačas le manušenge, save vakeren o previsarde lava;

¹³ olenge, ko omukle o rovna droma a gele pro bange droma andro kaľipen.

¹⁴ On radisaľon, sar keren o nalačhipen a thoven o baripen andro previsarde veci.

¹⁵ Kale manušengre droma hine bange a lengre chodňiki hine nalačhe.

Ma dža pro drom la lubňakro

¹⁶ O goďaveripen tut zachraňinela la lubňatar; la avra džuvľatar, savi pes tuke guľarel le lavenca,

¹⁷ savi omukľa le romes, saves peske iľa, sar sas terňi, a bisterďa pre zmluva, so kerďa anglo Del.

¹⁸ O drom andre lakro kher ľidžal andro meriben, bo džal tele andro than le mulengro.

¹⁹ Ňiko olendar, ko džal ke late, na avel pale, a šoha pes na visarel pale pro drom le dživipnaskro.

²⁰ Vašoda phir pal o drom le lačhe manušengro the pal o chodňikos le spravodľive manušengro.

²¹ Bo o pačivale bešena andre phuv a o žuže anglo Del ačhena andre,

²² ale o bijedevleskre ena avričhide a o napačivale ena avricirdle le koreňenca.