Prislovja 17 - Le Devleskero Lav Andre Romaňi Čhib Slovensko 2021

¹ Te chal sikra šuko maro andro smirom hin feder, sar te el andro kher pre bari oslava, kaj pes vesekedinel.

² O goďaver sluhas vladňinela upral le rajeskro čhavo, savo kerel ladž, a leskre phralenca chudela o kotor le ďeďictvostar.

³ O somnakaj the o rup pes prežužarel andre jag a o jilo le manušeskro hino preskušimen le RAJESTAR.

⁴ O nalačho manuš šunel oles, ko vakerel o nalačho, a o klamaris šunel oles, ko vakerel o klamišagos.

⁵ Oda, ko asal le čorestar, tele dikhel le Devles, savo les kerďa; oda, ko radisaľol avrengre pharipnastar, ela mardo.

⁶ O phure manuša thoven baripen andre le čhavengre čhave, a o čhave thoven baripen andre peskre dada.

⁷ Le dilineske na pasinel te vakerel rajikanes, avke sar le vladcaske na pasinel te klaminel.

⁸ O prepočiňiben dičhol oleske, ko les del, sar vareso, so prianel e bach; gondoľinel peske, hoj sa leske všadzik avela avri.

⁹ Ko odmukel o nalačhipen, rodel o kamiben, ale oda, ko oda furt leperel, musarel o prijaťeľstvo.

¹⁰ Le goďavereske anel buter chasna jekh dovakeriben, sar le dilineske šel rani la pacaha.

¹¹ O nalačho manuš rodel ča e vzbura, vašoda pes pre leste bičhavela o meribnaskro poslos.

¹² Feder hin te arakhel pes la medveďicaha, savatar ile le ciknoren, sar le dilineha akor, sar kerel o diliňipen.

¹³ O nalačhipen na džala avri andral o kher oleske, ko vaš o lačho visarel pale o nalačho.

¹⁴ Sar chudel o vesekedišagos, sar te pes mukľahas avri o paňi andral e hradza, vašoda preačh, medik na demel zorales avri.

¹⁵ Kala duj veci džungľon le RAJESKE: Te premukel le vinnovates abo te odsudzinel le čačipnaskres.

¹⁶ Pre soste hin o love andro vasta le dilineske? Cinela peske goďi? Se oleske na achaľol!

¹⁷ O prijaťeľis presikavel o kamiben andro dojekh časos a tiro phral tuke pomožinel andro pharipen.

¹⁸ Oda, ko našaďa e goďi, podel peskro vast a zaručinel pes vaš avreske.

¹⁹ Oda, ko pes rado vesekedinel, rado kerel o binos, a ko pes furt ašarel, rodel e zahuba.

²⁰ Oles, kas hin previsardo jilo, na ela bach, a kas hin e falošno čhib, doperela andre bibach.

²¹ Ko anďa pro svetos le nagoďaveres, rovela a o dad le dilineskro na radisaľola.

²² O radišagos andro jilo tut sasťarel, ale o strapimen duchos šučarel o kokala.

²³ O nalačho manuš lel počoral o prepočiňiben, a vašoda pes na rozhodňinel čačipnaha pro sudos.

²⁴ O goďaver peske kidel avri te kerel oda, so hin goďaver, ale o dilino furt gondoľinel pro všelijaka veci a na džanel, so kamel te kerel.

²⁵ O nagoďaver čhavo anel peskre dadeske e dukh, a peskra dake e žaľa.

²⁶ Nane mištes te del te počinel pokuta oles, ko ňič na kerďa, aňi te marel le lačhe manušes vaš o čačipen.

²⁷ Oda, ko hino goďaver, na vakerel but a oda, ko peske na domukel e choľi, hin o goďaver manuš.

²⁸ Sar o dilino hino čhit, the ov dičhol sar goďaver, a sar na vakerel, dičhol pes, hoj achaľol.