Prislovja 15 - Le Devleskero Lav Andre Romaňi Čhib Slovensko 2021

¹ O šukar lav odvisarel e choľi, ale o zoralo lav anel bareder choľi.

² O vakeriben le goďaverengro pricirdel le manušen te šunel o prindžaripen, ale le dilinengre vuštendar demel avri o diliňipen.

³ O jakha le RAJESKRE hine všadzik, dikhen pro nalačhe the pro lačhe manuša.

⁴ O šukar vakeriben hin sar o stromos le dživipnaskro, ale e previsarďi čhib dukhavel pro duchos.

⁵ O dilino na prilel le dadeskro sikaviben, ale ko prilel o dovakeriben, kerel mištes.

⁶ Andro kher le spravodľive manušeskro hin pherdo barvaľipen, no o love le nalačheske anen o pharipen.

⁷ O vušta le goďaverengre rozľidžan o prindžaripen, ale andro jile le dilinengre nane avke.

⁸ Le RAJESKE džungľon o obeti le nalačhe manušendar, ale pre dzeka leske hin e modľitba le čače manušengri.

⁹ Le RAJESKE džungľol o drom le nalačhe manušeskro, no kamel oles, ko kerel oda, so hin spravno.

¹⁰ Oda, ko omukel o čačo drom, ela zorales mardo, a ko na kamel te prilel o dovakeriben, merela.

¹¹ O RAJ dikhel andro than le mulengro the le meribnaskro, a keci buter andro jilo le manušengro?

¹² Oleske, ko peske kerel pheras savorestar, džungľol o dovakeriben, aňi na džala pal o goďaver te phučel.

¹³ O radišagos andro jilo rozšvicinel o muj, ale o smutňišagos anel e dukh pro duchos.

¹⁴ O jilo le goďavereskro rodel avri o prindžaripen, no o vušta le dilinengre pes čaľaren le diliňipnaha.

¹⁵ Le smutne manušes hin andro dživipen furt pharipen, ale olen, saven hin o radišagos andro jilo, hin furt lačhe dživesa.

¹⁶ Feder te sal čoreder a hin tut e sveto dar anglo RAJ, sar te el tut but barvaľipen a leha o pharipen.

¹⁷ Feder hin o zeleňinakro chaben andro kamiben, sar o nekfeder mas ode, kaj nane kamiben.

¹⁸ Oda, ko sig choľisaľol, anel o vesekedišagi, no oda, ko na choľisaľol sig, anel o smirom.

¹⁹ Te sal leňivo, ela tuke phares všadzik, ale te sal pačivalo, na ela tut ňisavo pharipen.

²⁰ O goďaver čhavo anel o radišagos le dadeske, no o nagoďaver čhavo tele dikhel peskra da.

²¹ Le nagoďaveres hin radišagos andro diliňipen, ale o goďaver phirel rovne dromeha.

²² Bijal e lačhi rada nane pre ňisoste o plani, no avena avri akor, sar hin but radci.

²³ Le manušes hin radišagos, sar odphenel le lačhe laveha; savo šukar hin o lav phendo ipen akor, sar kampel!

²⁴ O goďaver manuša phiren pal o drom, so len ľidžal upre andro dživipen a obdžan o drom, so džal tele andro meriben.

²⁵ O RAJ čhivela tele o khera le barikanengre, ale e phuv le vdovengro chraňinela.

²⁶ Le RAJESKE džungľol o nalačho gondoľišagos, no pre dzeka leske hin o lačhe lava.

²⁷ Ko izdral pal o napačivale love, kerel peskra famelijake pharipen, ale ko na kamel o prepočiňiben, dživela.

²⁸ O jilo le čačipnaskereskro gondoľinel, so te phenel, no andral o vušta le nalačhe manušengre demel avri o nalačhipen.

²⁹ O RAJ hino dur le nalačhendar a na šunel len, ale o mangipen le lačhengro šunel avri.

³⁰ Te le manušen hin o asaben pro muj, keren avrenge o radišagos a o lačho hiros tut dela sasťipen andro kokala.

³¹ Te prithoveha tiro kan paš o dovakeriben le dživipnaskro, bešeha maškar o goďaver.

³² Te na priles o sikaviben, tele dikhes pes korkores, no te šunes o dovakeriben, aveha goďavereder.

³³ E sveto dar le RAJESKRI tut bararel avri andro goďaveripen, te aveha pokorno, o manuša tut dena pačiv.