Prislovja 12 - Le Devleskero Lav Andre Romaňi Čhib Slovensko 2021

¹ Oda, ko rado prilel o dovakeriben, kamel o prindžaripen, a ko našťi avri ačhel o privakeriben, hino dilino.

² O lačho manuš hino le RAJESKE pre dzeka, ale odsudzinela oles, ko gondoľinel pro nalačho.

³ O nalačhipen na dela le manušeske te obačhel, no o koreňis le lačhe manušengro pes na čhalavela.

⁴ E lačhi romňi hiňi sar e koruna pro šero le romeske, ale odi, savi leske kerel ladž, hiňi sar o hňisos andre leskre kokala.

⁵ O lačhe gondoľinen, sar te kerel oda, so hin lačho, no o nalačhe ča roden, sar varekaha te thovel avri.

⁶ O lava le nalačhe manušengre hine sar e pasca, so užarel te murdarel, ale o lava le lačhengre zachraňinen.

⁷ O nalačhe peren a imar našľon, no e famelija le lačhe muršeskri ačhela furt.

⁸ Ašaren le manušes, te les hin goďi, ale dikhen tele oles, kas hin previsardo jilo.

⁹ Feder hin oda, ko nane baro manuš a hin les sluhas, sar oda, ko pes ľidžal upre a nane les so te chal.

¹⁰ O lačho pes starinel pal peskro dobitkos, ale o nalačho hino ke lende bijileskro.

¹¹ Ko kerel pre peskri maľa, čaľola le marestar, no oda, ko del peskro časos pre chocsoste, hino bi e goďi.

¹² O nalačho manuš igen džal pal oda, so hin le nalačhen, ale o koreňis le lačhengro anel uľipen.

¹³ O nalačho manuš pes chudela andre pasca le nalačhe lavenca, so vakerel, no o lačho pes lela avri andral o pharipen.

¹⁴ O goďaver lava anen but lačhipen oleske, ko len vakerel, a e phari buči leske anel o počiňiben.

¹⁵ Le dilineske pes dičhol leskro drom lačho, ale o goďaver šunel e rada.

¹⁶ O dilino sikavel peskri choľi takoj, no o goďaver peske na kerel ňič, sar leske dophenen.

¹⁷ O lačho švedkos vakerel o čačipen, ale o falošno phenel o klamišagos.

¹⁸ Oda, ko vakerel bi e goďi, sar te džubinďahas la šabľaha, no o goďaver sasťarel peskra čhibaha.

¹⁹ O čačipen ľikerela pro furt, ale o klamišagos ča pro sikra.

²⁰ Olen, ko gondoľinen te kerel o nalačho, hin o klamišagos andro jilo, no olen, ko anen o smirom, hin o radišagos.

²¹ Le lačheske pes na ačhela ňič nalačho, ale le nalačhes ela furt pharipen.

²² O vušta, so klaminen, džungľon le RAJESKE, no pre dzeka leske hin ola, ko doľikeren o lav.

²³ O goďaver na vakerel sig, so džanel, ale o jilo le dilineskro čhivkerel avri o diliňipen.

²⁴ Olendar, ko keren lačhi buči, ačhen vodci, no olendar, ko hine leňiva, ačhen otroka.

²⁵ O starišagos andro jilo ispidel le manušes tele, ale o šukar lav les hazdel upre.

²⁶ O spravodľivo manuš anela peskre prijaťeľis pro lačho drom, no o bijedevleskro pes pre peskro drom našavel.

²⁷ O leňivo peske na tavela aňi o mas le džvirostar, so chudňa, ale oda, ko kerel mištes buči, dochudela o baro barvaľipen.

²⁸ O čačipnaskro drom ľidžal andro dživipen; pre oda chodňikos nane o meriben.