Prislovja 10 - Le Devleskero Lav Andre Romaňi Čhib Slovensko 2021

Le Šalamunoskre privakeribena

¹ Kala hine le Šalamunoskre privakeribena: O goďaver čhavo anel le dadeske radišagos, ale o nagoďaver čhavo kerel pharipen la dake.

² O barvaľipen, so dochudes nalačhipnaha, tuke na ela pre chasna, no o spravodľišagos tut lel avri andral o meriben.

³ O RAJ na mukela le čačipnaskres te bokhaľol, ale le nalačhenge na domukela te chudel oda, so kamen.

⁴ Te aveha leňivo, aveha čoro, no te kereha e buči mištes, barvaľoha.

⁵ Ko skidel o uľipen ňilaje, hino goďaver čhavo, ale o čhavo, savo prekal e žatva sovel, hino pre ladž.

⁶ Pro čačipnaskro manuš bešela baro požehnaňje, ale o mariben hin garudo pal o lava le nalačhe manušengre.

⁷ O lačhe manuša ena leperde pro požehnaňje, ale o nav le bijedevleskro kirňola.

⁸ O goďaver prilel le jileha o prikazi, no ko vakerel o diliňipen, zňičinela pes korkores.

⁹ O pačivalo manuš phirel bi e dar, ale pre oda, ko phirel napačivalones, pes avela avri.

¹⁰ Ko džmurkinel la jakhaha, anel avreske dukh, a ko vakerel o diliňipen, ela zňičimen.

¹¹ O vušta le čačipnaskre manušeskre hine o prameňis le dživipnaskro, ale o vušta le bijedevleskre manušengre garuven o nalačhipen.

¹² Te pes našťi avri ačhas, ena o vesekedišagi, no o kamiben učharel andre savore nalačhipena.

¹³ Andral o vušta olenge, ko achaľon, avel o goďaveripen, ale ola, ko na achaľon, ena marde la pacaha.

¹⁴ Ola, ko hine goďaver, skiden upre o prindžaripen, no o vakeriben le dilineskro anel pharipen.

¹⁵ O barvaľipen chraňinel le barvalen sar o muri le foros, ale le čoren zňičinela o čoripen.

¹⁶ O počiňiben le čačipnaskro hin o dživipen, no o binos ľidžal ča ko buter bini.

¹⁷ O dživipen ela oles, ko prilel o dovakeriben, ale ko na prilel o dovakeriben, našavel o drom ko dživipen.

¹⁸ Oda, ko garuvel andre, hoj varekas našťi avri ačhel, hino klamaris. Ko vakerel o pľetki, hino dilino.

¹⁹ Ko vakerel but, šaj phenel vareso nalačho, ale ko zľikerel peskre vušta, hino goďaver.

²⁰ Oda, so vakerel o čačipnaskro, hin sar o žužo rup, no oda, so gondoľinen o bijedevleskre, na mol ňič.

²¹ O čačipnaskre vušta čaľaren but manušen, ale o diline meren, bo na achaľon.

²² O požehnaňje le RAJESKRO barvaľarel a na anel ňisavo pharipen.

²³ Le dilineske hin pre dzeka te kerel o nalačhipen, ale o goďaver arakhel o radišagos andro goďaveripen.

²⁴ O čačipnaskre chudena, so peske mangen, no le binošnenge pes ačhela oda, sostar pes nekbuter daran.

²⁵ Sar avela e bari balvaj, o binošno na obačhela, ale o čačipnaskro ačhela furt zorales.

²⁶ Sar hin o šut le dandenge a o thuv le jakhenge, avke hin o leňivo olenge, ko les den te kerel buči.

²⁷ E sveto dar anglo RAJ tut dela buter te dživel, ale o berša le bijedevleskre manušengre ena charneder.

²⁸ E naďej le spravodľivengri anel o radišagos, no o užaripen le nalačhengro našľola.

²⁹ O drom le RAJESKRO hin o hrados prekal o žužo manuš, ale zňičinela olen, ko keren o nalačhipen.

³⁰ O čačipnaskro pes šoha na čhalavela, no o bijedevleskre na ačhena andre phuv.

³¹ Andral o čačipnaskro muj avel o goďaveripen, ale e previsarďi čhib ela čhimen avri.

³² O čačipnaskre vušta džanen te vakerel šukar lava, ale o bijedevleskre vušta vakeren ča oda, so hin previsardo.