Prislovja 1 - Le Devleskero Lav Andre Romaňi Čhib Slovensko 2021

Pre soste hin o goďaver lava

¹ O goďaver lava le Šalamunoskre, le Davidoskre čhaskre, le Izraeloskre kraľiskre.

² Kala prislovja tuke pomožinena te prindžarel o goďaveripen, bararena tut avri, dena tuke te achaľol o goďaver lava;

³ sikavena tut sar te dživel andre bari goďi, te kerel, so hin lačho, čačipnaskro the spravno;

⁴ le manušes, saves nane goďi, dena goďi a le terne manušes dena o prindžaripen the o achaľuvipen.

⁵ O goďaver manuš len mi šunel a mi barvaľol andro prindžaripen, a oda, ko hino avrisikado, mi prilel e lačhi rada,

⁶ hoj te achaľol o goďaver lava the o podobenstva, o lava le goďavere manušengre the lengro garuďipen.

⁷ O prindžaripen chudel la sveta daraha anglo RAJ; ča o diline dikhen tele o goďaveripen the o sikaviben.

De pozoris pro nalačhe manuša

⁸ Čhavo miro, šun, so tuke phenel tiro dad a ma omuk oda, so tut sikavel tiri daj,

⁹ bo oda hin sar o šukar vencos pre tiro šero a sar o lancocis pre tiri meň.

¹⁰ Čhavo miro, te tut o binošna manuša cirdena te kerel o nalačho, phen lenge na.

¹¹ Te phenena: „Av amenca, arakhaha varekas a murdaraha les! Av chučaha pre varekaste, ko amen ňič na kerďa!

¹² Av, zachas leskro dživipen sar o Šeol a chas les calones sar oles, ko džal tele andre chev.

¹³ Laha peske savoro barvaľipen a pherdžaraha le čorde vecenca amare khera.

¹⁴ Av amenca andre partija a rozďelinaha pes savoreha.“

¹⁵ Čhavo miro, ma dža kajse dženenca, a ma thov tiro pindro pre lengre droma.

¹⁶ Se lengre pindre denašen te kerel o nalačho a siďaren te čhorel avri o rat.

¹⁷ Te o čiriklo dikhel, sar nacirdes e sita, na chudela pes,

¹⁸ ale on nacirden e sita prekal peste a keren e pasca, andre savi korkore merena.

¹⁹ Kada pes ačhel savorenge, savenge džal pal o nalačho ziskos: o nalačho ziskos lenge lel o dživipen.

O goďaveripen vakerel

²⁰ O goďaveripen vičinel avri pro uľici, zorales vakerel pro pľaci.

²¹ Zoraha vičinel paš o brani le foroskre, vakerel všadzik, kaj hine zgele but manuša:

²² Tumen diline, dži kana kamena o nagoďaveripen? Tumen, so asan, dži kana kamen te asal? Dži kana o diline na kamena o prindžaripen?

²³ Prilen mandar, sar tumenge dovakerav! A me tumenge anava avri oda, so man hin andro jilo, a dava tumenge te prindžarel mire lava.

²⁴ Ale vašoda, hoj tumen na kamenas te šunel, sar me vičinavas, a ňiko na ačhelas olestar, hoj me nacirdavas miro vast,

²⁵ vašoda, hoj dikhenas tele miri rada, a na priiľan mandar o lava, sar tumenge dovakeravas,

²⁶ asava tumendar, sar pre tumende avela o pharipen a sar pre tumende demela e pohroma;

²⁷ sar pre tumende avela o pharipen sar e burka a e bari pohroma pre tumende demela sar e zoraľi balvaj, sar tumenge ela phares a cerpinena,

²⁸ akor pre mande vičinena, ale me man na dava anglal, igen man rodena, ale na arakhena man,

²⁹ vašoda, bo našťi avri ačhenas o prindžaripen, a na sas tumen e sveto dar anglo Raj,

³⁰ miri rada dikhenas tele a visarenas tumen mange le dumeha, sar tumenge dovakeravas.

³¹ Akana chana o ovocje olestar, sar dživenas, a čaľona le nalačhipnastar, so kerenas.

³² O nagoďaver merena, bo odgele le goďaveripnastar, a o diline ena zňičimen, bo lenge sas mištes avke te dživel.

³³ Ale oda, ko man šunel, pes na mušinel te daral, dživela andro smirom a na darala pes le nalačhipnastar.