Nekšukareder giľi 7 - Le Devleskero Lav Andre Romaňi Čhib Slovensko 2021

O džuvľa

¹ Av pale, av pale, čhaje Šulamitko; av pale, av pale, hoj pre tu te dikhas! So kamen pre Šulamitka te dikhel, sar khelel andro taboris?

E džuvľi O murš

² Save šukar hin tire pindre andro sandalki, čhaje le princoskri! Tire klubi hine šukares avrikerde sar o šperki; sar e buči le majstroskre vastengri.

³ Tiri pupa hiňi sar o poharis, andre savo na chibaľinel e koreňimen mol; tiro pasos pašal o per hino sar e pšeňica pre kopa obthoďi le ľaľijenca.

⁴ Tire koľina hine sar duj terne gazeli, sar dvojički la gazelakre.

⁵ Tiri meň hiňi sar e veža la slonovinatar; tire jakha hine o jazera andro Chešbon paš e brana Bat-Rabim. Tiro nakh hino ajso šukar sar e veža andro Libanon, so hiňi anglo Damašek.

⁶ Tiro šero pre tute hin sar o verchos Karmel; tire bare bala tuke bľišťisaľon sar o fijalovo pochtan, o kraľis hino zachudlo andre tire husta bala.

⁷ Savi šukar sal; pre dzeka mange sal! Miri lasko, sar tutar radisaľuvav!

⁸ Tiri postava hiňi sar e palma a tire koľina sar lakro ovocje.

⁹ Phenďom: „Džava upre pre palma a chudava man lendar.“ Mi en tire koľina sar o hroznoskre strapci, mi voňinel tiro dichos sar o voňava phaba

¹⁰ a tiro čumiben sar e nekfeder mol. Mi džal e mol šukares oleske, kas kamav; mi predžal leske prekal o vušta the danda.

E džuvľi

¹¹ Me som oleskri, kas kamav, a ov pal ma džal.

¹² Av džas pre maľa, lasko miri; presovaha andro gava;

¹³ ušťaha sig tosara a džaha andro viňici, dikhaha, či imar kvitňisaľol o viňičis, či pes imar phundraven o kvitki, či imar kvitňisaľon o granatoskre phaba. Ode tuke dava miro kamiben.

¹⁴ O mandragori den avri peskri kamibnaskri voňa, paš amaro vudar hin savore vzacna plodi, neve the purane; garuďom tuke len, romoro miro.