Nekšukareder giľi 5 - Le Devleskero Lav Andre Romaňi Čhib Slovensko 2021

O murš

¹ Avľom andre miri zahrada, pheňe miri, terňije miri, obkidav miri mirha the miro koreňje; koštoľinav mire medostar, pijav miri mol the miro thud. Chan, mire prijaťeľale, pijen, mačon le kamibnastar.

O džuvľa E džuvľi

² Me sovavas, ale miro jilo sas upre. Šun! Oda, kas kamav, durkinďa. Phundrav mange, pheňe miri, lasko miri, holubico miri, nane pre tu chiba! Pro šero man hin pherdo rosa, o bala mange cinďile la račakra molhatar.

O murš E džuvľi

³ E rokľa čhiďom tele! Pale la urava? O pindre žužarďom le paňeha. Pale len meľarava?

⁴ Oda, kas kamav, nacirdňa peskro vast, hoj te phundravel o vudar, a miro jilo pes andre mande čhalaďa.

⁵ Ušťiľom upre te phundravel oleske, kas kamav, a mire vastendar čuľalas e mirha, prekal o angušta mange prečuľalas pre kľamka pro vudar.

⁶ Phundraďom oleske, kas kamav, ale ov ode imar na sas, geľa het. Ačhiľom smutno, rodavas les, ale našťi les arakhľom; vičinavas pre leste, ale na odphenelas mange.

⁷ Arakhle man o stražňika, sar phirenas pal o foros. Marde man, dukhade man, ile pal ma tele the o plašťos ola, ko stražinen o muros.

⁸ Den man lav, čhajale andral o Jeruzalem: Te arakhena oles, kas kamav, so leske phenena? Phenen leske, hoj som nasvaľi le kamibnastar!

O džuvľa

⁹ Soha hino feder oda, kas kames, avrendar, tu, nekšukareder maškar o džuvľija? Soha hino feder oda, kas kames, avrendar, hoj tut mušinas te del ajso lav?

E džuvľi

¹⁰ Oda, kas me kamav, hino šukar, lolečhamengro, feder sar deš ezera aver.

¹¹ Leskro šero hino ajso šukar sar o žužo somnakaj; leskre bala hine kučerava, kale sar o havranos;

¹² leskre jakha hine sar o holubici paš o paňa, avrithode (avrimorde) andro thud, zathode sar o drahokami.

¹³ Leskre čhama hine sar e zahrada, kaj barol pherdo koreňja; leskre vušta hine sar o ľaľije; kvapkinel lendar e mirha.

¹⁴ Leskre vasta hin o somnakune paci, obthode le vzacne barenca; leskro ťelos hin e hladko slonovina šukaľardi le zafirenca.

¹⁵ Leskre pindre hin o slupi le parne mramoristar ačhade pro somnakune podstavci. Dičhol avri sar o verchi andro Libanon, učo sar o cedri.

¹⁶ Leskre vušta hine igen gule; savoreha man pricirdel. Ajso hino oda, kas kamav, ajso hino miro prijaťeľis, čhajale andral o Jeruzalem!