Nekšukareder giľi 2 - Le Devleskero Lav Andre Romaňi Čhib Slovensko 2021

E džuvľi

¹ Me som ča e kvitka andro Šaron, ča e ľaľija, so barol andre dolina.

O murš

² Sar e ľaľija maškar o koľaka, ajsi hiňi miri laska maškar o terne čhaja.

E džuvľi

³ Sar o lačho phabengro stromos maškar o stromi andro veš, ajso hin oda, ko man kamel, feder sar savore terne čhave. Igen kamavas te bešel andre leskro ciňos a leskro ovocje hino gulo andre miro muj.

⁴ Domukľa mange te pijel peskri kamibnaskri mol, leskro kamiben sas upral mande sar e zastava.

⁵ Občerstvinen man le hrozienkenca! Zoraľaren man le phabenca, bo som nasvaľi le kamibnastar!

⁶ Leskro baľogno vast hin tel miro šero a peskre čače vasteha man obchudel.

⁷ Den man lav, čhajale andral o Jeruzalem, anglo srnki the anglo gazeli! Ma čhalaven amaro kamiben, medik o kamiben korkoro na kamela.

Dujto giľi E džuvľi

⁸ Šunav o hangos oleskro, ko man kamel! Dikh, avel kade! Chučkerel pal o verchi a denašel pal o brehi;

⁹ hino sar e gazela, sar o terno jeleňis. Dikh, kade ačhel pal amaro muros; dikhel andre prekal o oblaki, zadikhel prekal o mreži.

¹⁰ Prevakerďa ke ma oda, ko man kamel: „Ušťi upre, lasko miri, av, miri šukarori!

¹¹ Dikh, o jevend imar pregeľa; o brišind preačhiľa, geľa het.

¹² O kvitki aven avri pre phuv! Avľa o časos pro giľavipen! O hangos la hrdličkakro šunďol andre amari phuv.

¹³ Pro figovňikos barol o terne figi, o viňici kvitňisaľon a šukares voňinen. Ušťi upre, lasko miri, av, miri šukarori!“

O murš

¹⁴ Holubico miri, garuďi sal andre chev andre skala, andre skalakri škara. Sikav mange tiro muj a domuk mange te šunel tiro hangos; bo mištes šunďol tiro hangos a šukar hin tiro muj.

¹⁵ Chuden amenge le lišken, le cikne lišken, so musaren o viňici, amare viňici, so imar kvitňisaľon.

E džuvľi

¹⁶ Oda, ko man kamel, hino miro a me som leskri; čaľarel pes maškar o ľaľije.

¹⁷ Medik na predžal o džives a o ciňos na našľol, visaľuv pale, tu, so man kames, av ajso sar e gazela, sar o terno jeleňis pro Beterska verchi.