Nekšukareder giľi 1 - Le Devleskero Lav Andre Romaňi Čhib Slovensko 2021

¹ E nekšukareder giľi le Šalamunoskri.

Ešebno giľi E džuvľi

² Ó, te man furt čumidľalas tire vuštenca! Tiro kamiben hino feder sar e mol.

³ Šukares voňinel tiro parfumos; tiro nav hin sar o nekfeder parfumos, vašoda tut o terne čhaja kamen.

⁴ Le man tuha, av denašas! Ľidža man, kraľina miro, andre tire khera! Radisaľuvaha a thovaha baripen andre tu, lašaraha tiro kamiben buter sar e mol. Na čudaľinav man, hoj tut o terne čhaja avke kamen.

⁵ Kaľori som, ale šukar, čhajale le Jeruzalemoskre, kaľori sar o stani le Kedaroskre, sar o zavesi andro Šalamunoskro palacis.

⁶ Ma dikhen man tele, hoj som kaleder, hoj man chudňa o kham. O čhave mira dakre pre ma choľisaľile a thode man te stražinel o viňici, ale miri viňica me zamukľom.

⁷ Phen mange avri, tu, saves avke kamav: Kaj pašineha tiro stados? Kaj odpočovineha pro dilos? Soske te avav sar e napačivaľi džuvľi paš o stadi tire prijaťeľengre?

O murš

⁸ Tu, so sal nekšukareder le džuvľendar, te na džanes, kaj hin oda than, dža pal o stopaja le bakrengre a muk tire kozicen te chal e čar paš o stani le pasťjerengre.

⁹ Tu sal ajsi šukar, lasko miri, sar e terňi kobila, so cirdel le faraonoskro verdan!

¹⁰ Tire čhama hine igen šukar le ozdobenca andro kana, tiri meň le perlengre lancociha.

¹¹ Keraha tuke o somnakune lancici le rupune guľičkenca.

E džuvľi

¹² Medik pašľolas miro kraľis pre peskro divanos, miro parfumos šukares voňinelas.

¹³ Oda, kas kamav, mange hino sar e voňavo mirha, so mange pašľol pro koľin;

¹⁴ hino mange sar o kvitki henna andre viňica paš o En-Gedi.

O murš

¹⁵ Ó, savi šukar sal, lasko miri! Igen šukar sal! Tire jakha hine sar holubici.

E džuvľi

¹⁶ Ó, savo šukar sal tu, lasko miri! Čačes sal šukar! E zeleno čar hiňi amaro hadžos.

¹⁷ O hranoli pre amaro kher hine le cedrostar, amaro plafonos hin le sosnendar.