Matuš 15 - Le Devleskero Lav Andre Romaňi Čhib Slovensko 2021

O tradiciji le phurederengre

¹ Akor avle ko Ježiš o zakoňika the o Farizeja andral o Jeruzalem a phende leske:

² „Soske tire učeňika na doľikeren oda, so amenge dine o phure? Bo na thoven (omoren) o vasta, sar džan te chal o maro.“

³ Ov odphenďa: „A tumen soske na doľikeren le Devleskro prikazaňje, ale čerinen les vaš tumari tradicija.

⁴ Bo o Del phenďa: ‚De pačiv tira da the tire dades! A oda, ko košel la da the le dades, mušinel te merel!‘

⁵ Ale tumen phenen: ‚Sako, ko phenďahas la dake abo le dadeske: Oda, so šaj diňomas tumenge, thoďom pre sera le Devleske sar daros, našťi tumenge oda dav.‘

⁶ Avke tumen phenen, hoj na kampel te del pačiv la da vaj le dades. Kajse tumare tradicijenca musaren le Devleskro prikazaňje.

⁷ Tumen dujemujengre, mištes pal tumende prorokinelas o prorokos Izajaš, sar phenďa:

⁸ ‚Kala nipi man lašaren le mujeha, ale lengro jilo hino mandar dur.

⁹ Hijaba man lašaren, bo sikaven o sikaviben le manušengro.‘ “

¹⁰ Paľis o Ježiš vičinďa ke peste le nipen a phenďa lenge: „Šunen a achaľon!

¹¹ Le manušes na meľarel oda, so džal andro muj, ale oda, so avel avri andral o muj.“

¹² Akor avle leskre učeňika a phende leske: „Džanes, hoj o Farizeja rušle, sar šunde oda lav?“

¹³ Ov odphenďa: „Dojekh rastlina, savi na sadzinďa miro Dad andral o ňebos, ela cirdľi avri le koreňenca.

¹⁴ Muken len avke! On korkore hine kore a kamen te ľidžan avre koren. A te jekh koro ľidžala avre kores, sodujdžene perena andre chev.“

¹⁵ O Peter leske phenďa: „Phen amenge avri pal oda podobenstvo!“

¹⁶ A o Ježiš phučľa: „So the tumen mek na achaľon?

¹⁷ Na achaľon, hoj savoro, so avel andro muj, džal andro per a odarik džal avri?

¹⁸ Ale oda, so avel avri andral o muj, avel andral o jilo a oda meľarel le manušes.

¹⁹ Bo andral o jilo avel avri o nalačho gondoľišagos – te murdarel, te kerel lubipen, te čorel, te svedčinel falošňe a te ruhinel pes.

²⁰ Kada hin oda, so meľarel le manušes. Ale te chal le vastenca, so nane avrithode, na meľarel le manušes.“

O pačaben la Kanaankakro

²¹ O Ježiš odarik geľa het a geľa andro phuva Tir the Sidon.

²² A varesavi Kanaansko džuvľi andral odi phuv avľa ke leste a viskinelas: „Av ke ma jileskro, Rajeja, Čhavo le Davidoskro! Miri čhaj hiňi igen zaphandľi le demonenca.“

²³ Ale ov lake na odphenďa aňi lav. Akor avle ke leste leskre učeňika a mangenas les: „Bičhav la het, bo viskinel pal amende.“

²⁴ Ale ov odphenďa: „Me som bičhado ča ko bakrore, save našľile andral o kher le Izraeloskro.“

²⁵ Ale oj avľa, banďiľa anglal leste a phenďa: „Rajeja, pomožin mange!“

²⁶ Ov odphenďa: „Nane šukares te lel le čhavorenge o maro a te čhivel les le rikonorenge.“

²⁷ Oj odphenďa: „He, Rajeja, ale the o rikonore telal o skamind chan o trušini, so peren lengre rajenge.“

²⁸ Akor lake o Ježiš odphenďa: „Džuvľije, baro hin tiro pačaben! Mi ačhel pes tuke avke, sar kames.“ A lakri čhaj sasťiľa avri ola oratar.

O Ježiš sasťarel paš o Galilejsko moros

²⁹ Sar o Ježiš odarik odgeľa, avľa ko Galilejsko moros. Geľa upre pro verchos a ode peske bešľa.

³⁰ Avle ke leste igen but nipi, save peha ande le bangen, le koren, le ňemen, le kaľiken the mek but avren. Thovenas len paš o pindre le Ježišoske a ov len sasťarelas avri.

³¹ O nipi pes čudaľinenas, sar dikhle, hoj o ňema vakeren, o kaľiki hine saste, o bange phiren, o kore dikhen a lašarenas le Izraeloskre Devles.

O Ježiš del te chal štar ezera manušen

³² O Ježiš peske vičinďa peskre učeňiken a phenďa: „Pharo mange hin vaš kala nipi, bo imar trin dživesa hine manca a nane len so te chal. Na kamav len te bičhavel khere bokhalen, hoj te na odperen pal o drom.“

³³ O učeňika leske phende: „Khatar laha pre kada omuklo than ajci maro, hoj te das te chal kajci but dženen?“

³⁴ „Keci tumen hin mare?“ phučľa lendar o Ježiš. „Efta the vajkeci ribici,“ odphende.

³⁵ Akor phenďa le nipenge, hoj peske te bešen pre phuv.

³⁶ Iľa ola efta mare the ola ribi, paľikerďa, phagerelas a podelas peskre učeňikenge a o učeňika denas le nipenge.

³⁷ Chale savore a čaľile. Olestar, so ačhiľa, kidle upre efta pherde košara.

³⁸ Savore, so chale, sas vaj štar ezera (4 000) murša, bi o džuvľa the bi o čhave.

³⁹ Paľis rozmukľa le nipen, geľa andre loďka a avľa andre phuv paš o forocis Magadan.