Лукастар 1 - Le Devleskero Lav Andre Romaňi Čhib Slovensko 2021

O angluno vakeriben

¹ Imar but džene kamenas te pisinel andre ola veci, so pes ačhile ke amende,

² sar amenge oda podine ola, ko oda dikhle pre peskre jakha ešebnovarestar a ačhile služobňika andro lav.

³ Vašoda, lačho Teofilona, the me mange phenďom, hoj kampel mištes te preskuminel a te predžal ola veci ešebnovarestar zaradom avke, sar pes ačhile, a te pisinel tuke,

⁴ hoj mištes te prindžares o čačipen pal ola veci, so tut sikavenas.

O Zachariaš the e Alžbeta

⁵ Andre ola dživesa, sar kraľinelas andre Judsko o Herodes, dživelas ode jekh rašaj o Zachariaš. Ov sas le Abijašiskre rašajendar. Leskri romňi e Alžbeta sas le Aronoskre potomkendar.

⁶ Sodujdžene sas čačipnaskre anglo Del a pačivales doľikerenas savore zakoni the prikazaňja le Rajeskre.

⁷ Ale na sas len čhave, bo e Alžbeta našťi ačhiľa khabňi a sodujdženenge sas imar buter berša.

⁸ Jekh džives avľa pro Zachariaš o šoros te kerel anglo Del e rašajiko služba,

⁹ bo le rašajen sas ajso zvikos te losinel a o losos peľa pre leste. Avke geľa andro chramos le Rajeskro, hoj te labarel o kaďidlos.

¹⁰ A sar thuvisaľolas o kaďidlos, avri pes modľinenas igen but nipi.

¹¹ Androda pes sikaďa le Zachariašiske o aňjelos le Rajeskro a ačhelas pre čači sera le oltariskri, kaj pes labarelas o kaďidlos.

¹² Sar les dikhľa o Zachariaš, predaranďiľa a avľa pre leste bari dar.

¹³ Ale o aňjelos leske phenďa: „Ma dara tut Zachariaš, bo tiro mangipen hin avrišundo! Tiri romňi e Alžbeta ačhela khabňi, uľola lake muršoro a deha leske o nav Jan.

¹⁴ Ela tut baro radišagos a thoveha baripen andre leste a but džene radisaľona, sar uľola!

¹⁵ Bo ov ela baro anglo Raj. Na pijela mol aňi ňisavo aver pijiben a ela pherdžardo le Svete Duchoha imar peskra dake andro per.

¹⁶ A but čhaven le Izraeloskren anela pale ko Raj, ke lengro Del.

¹⁷ Ov korkoro džala anglal o Raj andro duchos the andre zor le Eliašiskri, hoj te visarel o jile le dadengre ko čhave a te visarel olen, ko na šunen le Devles, ke goďi the ko čačipen a hoj le Rajeske te pripravinel le nipen.“

¹⁸ Ale o Zachariaš phučľa le aňjelostar: „Pal soste oda prindžarava? Me som imar phuro a the mira romňake hin but berša.“

¹⁹ Akor leske o aňjelos odphenďa: „Me som o Gabriel, savo ačhel anglo Del, a som bičhado vašoda, hoj tuha te vakerav a te phenav tuke kadi lačhi sprava.

²⁰ Dikh, ačheha ňemo a našťi prevakereha dži andre oda džives, medik pes kada savoro na ačhela! Bo na pačanďiľal mire lavenge, save pes ačhena andro spravno časos.“

²¹ O nipi užarenas le Zachariaš a čudaľinenas pes, soske pes kajci zľikerďa andro chramos.

²² Sar avľa avri, našťi ke lende prevakerďa, bo ačhiľa ňemo. Sikavelas lenge le vastenca a pal oda prindžarde, hoj dikhľa viďeňje andro chramos.

²³ Sar pregele o dživesa leskra službakre, geľa pale khere.

²⁴ Pal ola dživesa ačhiľa khabňi e Alžbeta, leskri romňi, a garuvelas pes pandž čhon.

²⁵ Phenelas: „O Raj prekal ma kada kerďa andre kala dživesa, sar pre ma dikhľa peskre lačhipnaha a iľa mandar e ladž anglal o nipi.“

O aňjelos pes sikavel la Mariake

²⁶ Andre šovto čhon o Del bičhaďa le aňjelos Gabriel andro galilejsko foros Nazaret

²⁷ ke pačivaľi džuvľi Maria, savi sas mangaďi le Jozefoha. O Jozef sas potomkos le Davidoskro.

²⁸ Oda aňjelos avľa ke late a phenďa lake: „Smirom tuke! Chudňal e bari milosť a o Raj hino tuha.“ [„Bachtaľi sal maškar o džuvľa!“]

²⁹ E Maria pes čudaľinelas le aňjeloskre lavenge a gondoľinelas pal oda, sar lake pozdravinďa.

³⁰ Ale o aňjelos lake phenďa: „Ma dara tut Mario, bo chudňal e milosť le Devlestar.

³¹ A dikh, ačheha khabňi, uľola tuke čhavoro a deha leske nav Ježiš.

³² Ov ela baro a vičinela pes Čhavo le Nekbaredereskro. A o Raj, o Del, leske dela o tronos le Davidoskro, leskre dadeskro

³³ a ov kraľinela upral o kher le Jakoboskro pro furt a leskre kraľišagoske na ela šoha koňec.“

³⁴ E Maria phučľa le aňjelostar: „Sar pes oda ačhela, se me som mek pačivaľi?“

³⁵ O aňjelos lake phenďa: „O Sveto Duchos avela pre tu a e zor le Nekbaredereskri tut učharela andre. Vašoda oda čhavoro, so tutar uľola, ela sveto a vičinela pes Čhavo le Devleskro.

³⁶ Dikh, tiri famelija e Alžbeta, pre savi phende, hoj la našťi el čhave, hiňi imar šovto čhon khabňi, kajte hiňi phuri.

³⁷ Bo o Del šaj kerel savoro.“

³⁸ „Me som le Rajeskri služobňička,“ phenďa e Maria. „Mi ačhel pes mange pal tire lava.“ A o aňjelos latar odgeľa.

E Maria ke Alžbeta

³⁹ Andre ola dživesa e Maria ušťiľa a siďarelas andro foros pre brehengri phuv andre Judsko.

⁴⁰ Geľa andro kher ko Zachariaš a pozdravinďa la Alžbetake.

⁴¹ Sar šunďa e Alžbeta la Mariakro pozdravos, podchučiľa andre late o čhavoro a e Alžbeta sas pherdžarďi le Svete Duchoha.

⁴² A vičinďa zorale hangoha: „Bachtaľi sal maškar o džuvľa a bachtalo hin oda, ko tutar uľola!

⁴³ Ale sar oda hoj mire Rajeskri daj avel ke mande?

⁴⁴ Bo soča šunďiľa andre mire kana tiro hangos, sar man pozdravinďal, o čhavoro pes radišagoha čhalaďa andre miro per!

⁴⁵ Bachtaľi sal, bo pačanďiľal, hoj pes ačhela oda, so tuke o Raj phenďa!“

E giľi la Mariakri

⁴⁶ E Maria phenďa: „Miri duša bararel le Rajes

⁴⁷ a miro duchos radisaľol andro Del, miro Spasiťeľis,

⁴⁸ bo dikhľa pre peskri pokorno služobňička. Akanastar man savore pokoleňja vičinena bachtaľi,

⁴⁹ bo bare veci prekal ma kerďa o zoralo Del, saveskro nav hin sveto.

⁵⁰ Le Devleskri milosť džal andral jekh pokoleňje pre aver; pre ola, ko pes lestar daran.

⁵¹ Ov sikaďa o zorale skutki peskre vasteha a roztradňa olen, ko pes ľidžanas upre andro jile,

⁵² le zoralen čhiďa tele pal o tronos a hazdňa upre olen, ko sas teledikhle;

⁵³ le bokhalen pherdžarďa le lačhe vecenca a le barvalen bičhaďa het a na diňa len ňič.

⁵⁴ Pomožinďa le Izraeloske, peskre služobňikoske, bo na bisterel pre peskri milosť,

⁵⁵ avke sar diňa lav amare daden, le Abraham the leskre čhaven pro furt.“

⁵⁶ E Maria ačhiľa la Alžbetaha vaj trin čhon a paľis geľa pale khere.

O Jan Krsťiťeľ uľol

⁵⁷ Avke avľa oda časos, hoj e Alžbeta te ločhol, a uľiľa lake muršoro.

⁵⁸ Sar pes dodžanle lakre susedi the famelija, savi bari milosť lake presikaďa o Raj, chudle laha te radisaľol.

⁵⁹ Pre ochtoto džives avle te obrezinel le čhavores a kamle leske te del o nav Zachariaš pal leskro dad.

⁶⁰ Ale leskri daj phenďa: „Na, bo vičinela pes Jan.“

⁶¹ Phende lake: „Se ňiko nane andre tiri famelija, ko pes avke vičinel!“

⁶² Avke pes visarde ke leskro dad a le vastenca lestar phučle, savo nav leske kamel te del.

⁶³ Ov peske mangľa tabuľka a pisinďa: „Leskro nav hin Jan.“ A savore pes čudaľinenas.

⁶⁴ Jekhvareste pes le Zachariašiske phundraďa o muj a pomukľa leske e čhib. Chudňa te vakerel a lašarelas le Devles.

⁶⁵ Akor avľa dar pre savorende, so pašal lende bešenas, a pal caľi brehengri phuv andre Judsko pes vakerelas pal kala veci.

⁶⁶ Savore, so pes pal oda došunde, gondoľinenas andre peskre jile a phenenas: „So oda ča ela kale čhavorestar?“ Bo le Rajeskro vast sas upral leste.

Le Zachariašiskro proroctvos

⁶⁷ O Zachariaš, le Janoskro dad, sas pherdžardo le Svete Duchoha a prorokinelas:

⁶⁸ „Požehňimen hin o Del, o Raj le Izraeloskro, bo avľa ke peskre nipi a cinďa len avri.

⁶⁹ Diňa amen zorale Spasiťeľis andral o potomstvos le Davidoskro, peskre služobňikoskro,

⁷⁰ avke sar imar čirlastar vakerelas prekal o muja peskre svete prorokengre,

⁷¹ hoj amen zachraňinela andral o vasta amare ňeprijaťeľengre the savorengre, ko amen našťi avri ačhen.

⁷² Oleha sikavel peskri milosť amare dadenge a leperel peske pre peskri sveto zmluva,

⁷³ pro lav, so diňa le Abraham amare dades,

⁷⁴ hoj amen zachraňinela andral o vasta amare ňeprijaťeľengre, hoj leske te služinas bi e dar,

⁷⁵ svetones the andro čačipen sako džives andre amaro dživipen.

⁷⁶ A tut, čhavoreja, vičinena prorokos le Nekbaredereskro, bo džaha anglal o Raj, hoj leske te pripravines o drom;

⁷⁷ hoj te des te džanel leskre nipenge, hoj ena spasimen prekal oda, hoj lenge ena odmukle o bini.

⁷⁸ Bo prekal le Devleskri bari milosť avela o spaseňje ke amende andral o ňebos, avke sar avel avri o kham,

⁷⁹ hoj te švicinel olenge, ko bešen andro kaľipen the andro ciňos le meribnaskro, hoj te ľidžal amare pindre pro drom, kaj hin o smirom.“

⁸⁰ A o čhavoro barolas a zoraľolas andro duchos. A paľis dživelas pre pušťa dži andre oda džives, medik pes na sikaďa le Izraeloskre manušenge.