Roviben le Jeremijašiskro 5 - Le Devleskero Lav Andre Romaňi Čhib Slovensko 2021

O mangipen vaš e milosť

¹ Leper tuke, RAJEJA, so pes amenca ačhiľa; dikh pre amende, sar amen tele dikhen!

² Amaro ďeďictvos chudle o cudzinci, a amare khera o cudza manuša.

³ Ačhiľam široti bi o dada; amare daja hine vdovi.

⁴ Mušinas te počinel vaš amaro paňi, so pijas, a mušinas peske te cinel amare kašta.

⁵ Ola, ko pre amende džan, amen furt na den smirom; ačhiľam strapimen a našťi peske oddichňinas.

⁶ Poddiňam pes le Egiptoske the la Asirijake, hoj te chas maro.

⁷ Amare dada kerenas o bini a imar na dživen. A amen ľidžas lengro trestos.

⁸ Vladňinen upral amende o otroka a nane ko amen te cirdel avri andral lengre vasta.

⁹ Te kamas te chal o maro, riskinas amaro dživipen, bo džas pre pušťa, kaj amen šaj murdaren le šabľenca.

¹⁰ Amari cipa hiňi tači sar bov; bokhatar amen hin bare horučki.

¹¹ Amare džuvľija sas zňeužimen pro Sion, the o pačivale čhaja andro judska fori.

¹² Amare rajen figinenas peskre vastenca a le phure manušenge na presikavenas ňisavi pačiv.

¹³ Amare terne čhaven ispiden te kerel buči sar otroken andro mlinos a amare muršorenge poddžan o pindre, sar hordinen o phare kašta.

¹⁴ O phure murša preačhile te zabešel andre brana a o terne čhave preačhile te bašavel.

¹⁵ Amare jile preačhile te radisaľol; amaro kheľiben pes visarďa pro roviben.

¹⁶ Peľa amenge e koruna pal o šero. Vigos amenge, bo kerahas o bini!

¹⁷ Angle kada amen dukhan o jile a angle kada savoro amenge o apsa koraren o jakha;

¹⁸ anglo verchos Sion, savo hino zňičimen a o liški odarik denašen.

¹⁹ Tu, RAJEJA, kraľines pro furt; tiro tronos ľikerel pal jekh pokoleňje pre aver.

²⁰ Soske pre amende furt bisteres? Soske amen ajci but omukes?

²¹ An amen pale ke tute, RAJEJA, a amen avaha pale. Obnovin amare dživesa, sar sas varekana.

²² Či amen odčhiďal imar pro furt? Avke zorales pre amende rušes?