Kazaťeľis 3 - Le Devleskero Lav Andre Romaňi Čhib Slovensko 2021

Savoreske hin dino peskro časos

¹ Savoreske hin dino peskro časos, o lačho ideos pre savoreste, so pes kerel pre phuv:

² Hin časos te avel pre kada svetos a hin časos te džal pal kada svetos, časos te sadzinel a časos te skidel upre,

³ časos te murdarel a časos te sasťarel, časos te čhivel tele a časos te ačhavel upre,

⁴ časos te rovel a časos te asal, časos pre žaľa a časos pro kheľiben,

⁵ časos te rozčhivkerel o bara a časos len te skidel upre, hin časos te obchudel a hin časos te zľikerel pes olestar,

⁶ časos te rodel a časos te našavel, časos te garuvel a časos te čhivel het,

⁷ časos te čhingerel a časos te sivel, časos te čhitel a časos te vakerel,

⁸ časos te kamel a časos te na kamel, časos pro mariben a časos pro smirom.

So amen o Del del te kerel

⁹ So hin le manušes ola bučatar, savaha pes avke trapinel?

¹⁰ Dikhľom, savi phari buči diňa o Del le manušen te kerel.

¹¹ O Del kerďa savoro igen šukares andre peskro časos. Ov thoďa the e večnosť le manušenge andro jile, ale o manuš našťi calkom achaľol, so o Del kerel anglunestar dži o koňec.

¹² Sprindžarďom, hoj nane prekal lende ňič feder, sar te radisaľol a te kerel o lačhipen andre peskro dživipen.

¹³ Ale the oda, te vareko šaj chal, pijel a radisaľol peskra bučatar, hin o daros le Devlestar.

¹⁴ Džanav, hoj savoro, so o Del kerel, ačhela pro furt. Našťi ke oda ňič te dothovel aňi ňič olestar te odlel, o Del oda avke kerďa, hoj lestar o manuša te daran.

¹⁵ Oda, so hin, sas imar čirla a oda, so ela, sas tiš imar angloda, bo o Del kerel, hoj pes te ačhel ola jekh veci pale a pale.

O nalačhipen andro svetos

¹⁶ A dikhľom mek vareso aver kade pre phuv: Pro sudos hin o klamišagos a ode, kaj majinel te el o čačipen, hin o nalačhipen.

¹⁷ Phenďom mange andro jilo: „O Del sudzinela sodujen – le čačipnaskres the le nalačhes – bo hin dino o časos pre dojekh veca the pre dojekh skutkos.“

¹⁸ Phenďom mange andro jilo: „Ačhel pes oda anglo manuša, bo o Del len skušinel, hoj lenge te sikavel, hoj hine ajse sar o džviri.

¹⁹ Se oda, so avel pro džviri, avel the pro manuša: Avke sar merel jekh, avke the o dujto. Sodujen hin jekh dichos. Nane le manušes ňič feder sar le džviros, bo sa hin zbitočno.

²⁰ Savoro džal pre oda jekh than; savoro hin kerdo le prachostar a savoro pale ačhela prachoske.

²¹ Ko džanel, či o duchos le manušeskro džal upre a či o duchos le džvirengro džal tele andre phuv?“

²² Avke avľom pre oda, hoj nane ňič feder sar oda, hoj o manuš te radisaľol la bučatar, so kerel, bo ada hin, so les diňa o Del. Se ko les anela pale, hoj te dikhel oda, so ela pal leste?