Kazaťeľis 10 - Le Devleskero Lav Andre Romaňi Čhib Slovensko 2021

¹ Sar o mule muchi khandisaren o parfumos, avke the o sikra diliňipen kerel buter sar o goďaveripen the pačiv.

² Le goďaveres hin o jilo pro čačo than, ale le dilines pro nalačho.

³ Mek the sar džal o dilino le dromeha, nane les goďi a sikavel savorenge, savo hino dilino.

⁴ Te pre tu hin choľamen o vladcas, ma omuk tiri buči; te ačheha čhit, preačhela leskri choľi.

⁵ Hin mek the aver nalačhipen, so dikhľom pre phuv, o vladara, so keren kajse chibi:

⁶ O dilino sas thodo pro baro than, no o barvale manuša pro cikno.

⁷ Dikhľom le sluhen te džal pro graja a le rajen te phirel sar sluhi pal e phuv.

⁸ Ko kopaľinel e chev, šaj perel andre; a oles, ko čhivel tele o muros, šaj danderel o sap.

⁹ Ko kerel buči le barenca, šaj pes lenca dukhavel; a ko čhingerel o kašta, šaj pes zraňinel.

¹⁰ Te varekaske tupisaľol o trast a na ostrarela les, mušinel te del andre oda buter zor, ale feder hin te kerel goďaha.

¹¹ Te o sap danderela angle oda, sar hino začarimen, o čaroďejňikos hino zbitočno.

¹² O lava andral o muj le goďavereskre anen leske pačiv, ale o vušta le nagoďavereskre zňičinena les korkores;

¹³ soča chudel te vakerel, vakerel o nagoďaver lava, a o koňec leskre lavengro hin o nalačho diliňipen;

¹⁴ o nagoďaver vakerel buter a buter. Ňiko na džanel, so pes ačhela. Ko šaj phenel varekaske, so pes ačhela pal leste?

¹⁵ O nagoďaver hino ajso strapimen peskra bučatar, hoj aňi na džanel o drom andro foros.

¹⁶ Vigos tuke, phuvije, te tiro kraľis hino terno, a te tire raja tosarastar but chan.

¹⁷ Bachtaľi sal, phuvije, te tiro kraľis hino rajikano murš, a te tire raja chan akor, sar pes džal te chal, hoj te zoraľon a na te mačon.

¹⁸ Sar hin o manuš leňivo, rozperel o pados, sar o vasta ňič na keren, čuľal andro kher.

¹⁹ O maro anel o asaben, e mol anel o radišagos, ale bi o love na ela aňi jekh aňi aver.

²⁰ Ma koš le kraľis mek aňi andre tiri goďi, ma koš le barvales aňi khere pre tiro hadžos, bo o čirikloro šaj rozľidžala tire lava a phenela avri, so phenďal.