Jozua 21 - Le Devleskero Lav Andre Romaňi Čhib Slovensko 2021

O fori le Levitengre

¹ Akor avle o vodci andral o kmeňos Levi ko rašaj Eleazar, ko Jozua, ko čhavo le Nunoskro, the ko izraelika vodci

² andro foros Šilo, so hino andro Kanaan, a phende lenge: „O RAJ phenďa prekal o Mojžiš, hoj amen te den fori, kaj bešaha, the maľi prekal amare stadi.“

³ Avke o Izraeliti dine le Leviten peskre ďeďictvostar o fori le maľenca, avke sar lenge oda prikazinďa o RAJ.

⁴ Ešeb čhide o losi prekal e fajta le Kohatoskri. Prekal o losos o Leviti, o čhave le rašaskre le Aronoskre, chudle dešutrin (13) fori le kmeňendar Juda, Šimeon the Benjamin.

⁵ Okla manuša andral e fajta le Kohatoskri chudle prekal o losos deš fori le kmeňendar Efrajim, Dan the le jepaš kmeňostar Menaše.

⁶ E fajta le Geršonoskri prekal o losos chudňa dešutrin fori le kmeňendar Jisachar, Ašer, Naftali the le jepaš kmeňostar Menaše andre phuv Bašan.

⁷ E fajta le Merariskri chudňa pal peskre fameliji prekal o losos dešuduj (12) fori le kmeňendar Ruben, Gad the Zebulun.

⁸ Kavke o Izraeliti dine prekal o losos le Levitenge kala fori le maľenca, avke sar lenge oda prikazinďa o RAJ prekal o Mojžiš.

⁹ O kmeňi Juda the Šimeon dine kala fori pal lengre nava

¹⁰ le Aronoskre čhavenge andral e fajta le Kohatoskri, save sas Leviti. Bo ešeb čhide o losi prekal lende.

¹¹ Dine lenge o foros Kirjat-Arba leskre maľenca. Oda hin o Hebron pro brehi le Judaskre, so sas angloda o foros le Arbasoskro, le Anakoskre dadeskro.

¹² Ale o maľi kale foroskre the leskre gavenca dine sar ďeďictvos le Kaleboske, le Jefunoskre čhaske.

¹³ Le rašaskra Aronoskra famelijake dine kala fori le maľenca pro garuďipen prekal o vrahi: o Hebron, e Libna,

¹⁴ o Jatir, e Eštemoa,

¹⁵ o Cholon, o Debir,

¹⁶ o Ajin, e Juta the o Bet-Šemeš: eňa fori kale duje kmeňendar.

¹⁷ Le Benjaminčanengre phuvendar lenge dine kala fori le maľenca: o Gibeon, e Geba,

¹⁸ o Anatot the o Almon: štar fori.

¹⁹ Savore fori le maľenca, so sas dine le Aronoskra famelijake, sas dešutrin.

²⁰ Okla Leviti andral e fajta le Kohatoskri chudle prekal o losos o fori le kmeňostar Efrajim.

²¹ Pro brehi le Efrajimoskre len dine o foros Šichem le maľenca – so sas o foros pro garuďipen prekal o vrahi – the o Gezer,

²² o Kibcajim the o Bet-Choron: štar fori le maľenca.

²³ Le kmeňostar Dan len dine štar fori le maľenca: o Elteke, o Gibeton,

²⁴ o Ajalon the o Gat-Rimon.

²⁵ Andral e phuv le jepaš kmeňoskri Menaše len dine duj fori le maľenca: o Taanach the o Jibleam.

²⁶ Avke kala fameliji andral e fajta le Kohatoskri chudle deš fori le maľenca.

²⁷ Le Geršonoskra fajtake andral o kmeňos Levi dine: andral o jepaš kmeňos Menaše duj fori le maľenca: o Golan andro Bašan the e Beeštera le maľenca. O Golan sas o foros pro garuďipen prekal o vrahi.

²⁸ Andral o kmeňos Jisachar len dine štar fori le maľenca: o Kišjon, o Daberat,

²⁹ o Jarmut the o En-Ganim.

³⁰ Andral o kmeňos Ašer len dine štar fori le maľenca: o Mišal, o Abdon,

³¹ o Chelkat the o Rechob.

³² Andral o kmeňos Naftali len dine trin fori le maľenca: o Kedeš andre Galileja – so sas foros pro garuďipen prekal o vrahi – the o Chamot-Dor the o Kartan.

³³ Kala savore fori le maľenca, so chudňa e fajta le Geršonoskri, sas dešutrin.

³⁴ O Leviti andral e fajta le Merariskri chudle: le kmeňostar Zebulun štar fori le maľenca: o Jokneam, e Karta,

³⁵ e Dimna the o Nahalal.

³⁶ Andral o phuva le Rubenčanengre len dine štar fori le maľenca: o Becer, e Jahca,

³⁷ o Kedemot the o Mefaat.

^38-39 Andral o kmeňos Gad len dine štar fori le maľenca: o Ramot andro Gilead – so sas foros pro garuďipen prekal o vrahi – a mek o fori Machanajim, Chešbon the Jazer.

⁴⁰ Savore fori, so chudňa e fajta le Merariskri, sas dešuduj.

^41-42 Le Leviten sas jekhetane saranda the ochto (48) fori le maľenca maškar o phuva le Izraelitengre. Pašal dojekh foros le Levitengro sas maľa.

E phuv hiňi imar le Izraelitengri

⁴³ O RAJ diňa le Izraelitenge caľi phuv, pal savi diňa lav la veraha lengre daden. Zaile la a gele ode te bešel.

⁴⁴ O RAJ len diňa smirom andre dojekh phuv, avke sar diňa vera lengre daden, a ňiko lengre ňeprijaťeľendar anglal lende na obačhiľa. O RAJ lenge delas furt te zviťazinel upral lengre ňeprijaťeľa.

⁴⁵ O RAJ doľikerďa savore lava, so diňa le Izraeliten. Avke sar lenge phenďa, avke pes the savoro ačhiľa.