Jozua 16 - Le Devleskero Lav Andre Romaňi Čhib Slovensko 2021

O phuva le Efrajimoskre the le jepaš Menašeskre

¹ E phuv, so sas diňi prekal o losos le Jozefoskre čhavenge, chudel le Jordanostar paš o Jericho pro vichodos le Jerichoskre paňendar a e hraňica džal dži pre pušťa a upre ko brehi le Beteloskre,

² paľis dureder ko Luz, odarik ko Atarot – ke phuv le Arkijengri –

³ dureder pro zapados ke phuv le Jafletengri dži ke phuv ko Teluno Bet-Choron, dži ko Gezer, a končinel dži paš o moros.

⁴ Kala phuva chudle sar ďeďictvos o čhave le Jozefoskre, o Menaše the o Efrajim.

⁵ Le kmeňoske Efrajim sas dine pal leskre fameliji kala phuva: Ola phuva chuden le Atarot-Adarostar dži ko Upruno Bet-Choron

⁶ a dureder e hraňica džal ko moros, pro severos le Michmetatostar, paľis pro vichodos andro Taanat-Šilo a pašal leste pro vichodos predžal ko Janoach.

⁷ Khatar o Janoach džal tele andro Atarat the ke Naara a predžal pašes paš o Jericho dži ko Jordan.

⁸ Le forostar Tapuach džal e hraňica pro zapados paš o paňi Kana a končinel paš o moros. Kada ďeďictvos chudle o fameliji andral o kmeňos Efrajim.

⁹ The varesave fori le gavenca andral le Menašengre phuva sas dine le kmeňoske Efrajim.

¹⁰ Ale o Efrajimčana na tradle avri le Kanaančanen, save bešenas andro foros Gezer. Avke ačhile maškar lende dži adadžives, ale mušinenas prekal lende te kerel buči sar otroka.