Jozua 15 - Le Devleskero Lav Andre Romaňi Čhib Slovensko 2021

O phuva le Judaskre

¹ O fameliji andral o kmeňos Juda chudle prekal o losos odi phuv, so džal dži paš e phuv Edom, dži paš e pušťa Sin pro juhos.

² Pro juhos odi phuv chudel paš o brehos le Londe morostar, paš o moroskro agor, so hin dži tele pro juhos,

³ džal pro juhos prekal le verchengro drom Akrabim andre pušťa Sin a odarik džal pro juhos la Kadeš-Barneatar. Paľis chudel pašal o Checron upre ko Adar, kaj visaľol ke Karka,

⁴ odarik dureder ko Acmon a džal dži paš o paňi Egipt a ole paňestar dži paš o moros.

⁵ E vichodno hraňica la phuvakri le kmeňoskri Juda hin o Londo moros; džal dži ode, kaj o Jordan čuľal andre leste. Ode chudel e severno hraňica

⁶ a džal dži upre paš e Bet-Chogla a predžal khatar o severos la Bet-Arabatar upre ke skala le Bohanoskri, le Rubenoskre čhaskri.

⁷ Paľis leskri phuv chudel upre la dolinatar Achor ko Debir a odarik pes visarel pro severos ko Gilgal, so hino pre severno sera ola dolinatar paš o drom Adumim, odarik džal dureder ko paňa En-Šemeš the ko En-Rogel.

⁸ Paľis leskri phuv džal dureder upre andre dolina Ben-Hinom pro juhos le Jebusejengre forostar – oda hin Jeruzalem. Dureder džal dži upre ko verchos pro zapados le forostar the pro severos la Refajengra dolinatar.

⁹ Paľis leskri phuv chudel le verchostar tele ko than, khatar chudel te džal o paňi Neftoach, dureder ko fori pašes paš o verchos Efron, paľis tele ke Baala – oda hin o Kirjat-Jearim.

¹⁰ La Baalatar paľis pes visarel pro zapados ko verchos Seir a predžal pro severos le verchostar Jearim – oda hin Kesalon – a lestar tele ko Bet-Šemeš dži ke Timna.

¹¹ Paľis chudel pro severos le verchostar Ekron, visarel pes ko Šikron, džal dureder ko verchos Baala, paľis ko Jabneel a dži paš o moros.

¹² E zapadno hraňica la phuvakri, so chudňa o kmeňos Juda, hin o Stredozemno moros. Kala hine o hraňici prekal o kmeňos Juda pal leskre fameliji.

E phuv le Kaleboskri

¹³ O Jozua diňa le Kaleb, le Jefunoskre čhas, kotor le Judaskre phuvendar, avke sar leske oda phenďa o RAJ. Diňa leske o foros Kirjat-Arba, oda hin o Hebron. Oda foros sas le Arbasoskro, savo sas dad le Anakoskro.

¹⁴ O Kaleb odarik čhiďa avri le Anakoskre trine čhaven: le Šešaj, le Achiman the le Talmaj.

¹⁵ Odarik džanas pro mariben ko foros Debir, so pes angloda vičinelas Kirjat-Sefer.

¹⁶ Akor o Kaleb phenďa: „Oleske, ko zviťazinela upral o foros Kirjat-Sefer a zalela les, dava mira čha la Achsa romňake.“

¹⁷ O Otňiel, o čhavo le Kenazoskro, savo sas phral le Kaleboske, zaiľa odi phuv a avke chudňa la Achsa romňake.

¹⁸ Sar peske la iľa romňake, o Otňiel la kerďa upre, hoj peskre dadestar te mangel maľa. Sar geľa tele pal o somaris, o Kaleb latar phučľa: „So kames?“

¹⁹ Oj odphenďa: „Požehňin man le daroha. Te mange imar diňal e pušťa Negev, de mange the o paňa.“ Avke o Kaleb lake diňa o uprune the o telune prameňa.

²⁰ Kada hin o ďeďictvos le Judaskre kmeňoskro pal lengre fameliji.

²¹ Kala sas o fori le kmeňoskre Juda pro juhos dži paš e hraňica le Edomoskri: o Kabceel, o Eder, o Jagur,

²² e Kina, e Dimona, e Adada,

²³ o Kedeš, o Chacor, o Jitnan,

²⁴ o Zif, o Telem, o Bealot,

²⁵ e Chacor-Chadata, o Kerijot-Checron, oda hin Chacor,

²⁶ o Amam, e Šema, e Molada,

²⁷ e Chacar-Gada, o Chešmon, o Bet-Palet,

²⁸ o Chacar-Šual, e Beer-Šeba, e Bizjotja,

²⁹ e Baala, o Ijim, o Ecem,

³⁰ o Eltolad, o Kesil, e Chorma,

³¹ o Ciklag, e Madmana, e Sansana,

³² o Lebaot, o Šilchim, o Ajin-Rimon: jekhetane bišueňa (29) fori the lengre gavenca.

³³ Pre brehengri phuv Šefela oda sas kala fori: o Eštaol, e Cora, e Ašna,

³⁴ o Zanoach, o En-Ganim, o Tapuach, o Enam,

³⁵ o Jarmut, o Adulam, o Socho, e Azeka,

³⁶ o Šaarajim, o Aditajim, e Gedera the o Gederotajim: dešuštar (14) fori the lengre gavenca.

³⁷ Lengre fori sas the o Cenan, e Chadaša, o Migdal-Gad,

³⁸ o Dilan, e Micpa, o Jokteel,

³⁹ o Lachiš, o Bockat, o Eglon,

⁴⁰ o Kabon, o Lachmas, o Kitliš,

⁴¹ o Gederot, o Bet-Dagon, e Naama the e Makeda; dešušov (16) fori the lengre gavenca.

⁴² Lengre fori sas the e Libna, o Eter, o Ašan,

⁴³ o Jiftach, e Ašna, o Necib,

⁴⁴ e Keila, o Achzib the e Mareša; eňa fori lengre gavenca.

⁴⁵ Sas lengro the o foros Ekron le cikne forenca the le gavenca;

⁴⁶ a le Ekronostar dži ko moros savore fori paš o foros Ašdod lengre gavenca.

⁴⁷ O Ašdod the Gaza leskre cikne forenca the gavenca a odarik savoro dži ko paňi Egipt the ko brehos le Stredozemne moroskro.

⁴⁸ Chudle mek o fori pro brehi: o Šamir, o Jatir, o Socho,

⁴⁹ e Dana, e Kirjat-Sana, oda hin Debir,

⁵⁰ o Anab, o Eštemo, o Anim,

⁵¹ o Gošen, o Cholon the o Gilo: dešujekh (11) fori the lengre gavenca.

⁵² O Arab, e Duma, o Ešan,

⁵³ o Janum, o Bet-Tapuach, e Afeka,

⁵⁴ e Chumta, e Kirjat-Arba (oda hin o Hebron) the o Cior: eňa fori the lengre gavenca.

⁵⁵ O Maon, o Karmel, o Zif, e Juta,

⁵⁶ o Jezreel, o Jokdeam, o Zanoach,

⁵⁷ o Kajin, e Gibea the e Timna: deš fori the lengre gavenca.

⁵⁸ O Chalchul, o Bet-Cur, o Gedor,

⁵⁹ o Maarat, o Bet-Anot the o Eltekon: šov fori the lengre gavenca.

⁶⁰ O Kirjat-Baal, oda hin Kirjat-Jearim, the e Raba: duj fori the lengre gavenca.

⁶¹ Pre pušťa chudle e Bet-Araba, o Midin, e Sechacha,

⁶² o Nibšan, o Londo foros the o En-Gedi: šov fori the lengre gavenca.

⁶³ Ale o manuša le Judaskre našťi čhivenas avri le Jebusejen andral o Jeruzalem, avke ačhile dži adadžives te bešel paš lende.