Izajaš 32 - Le Devleskero Lav Andre Romaňi Čhib Slovensko 2021

O spravodľivo kraľišagos

¹ O kraľis kraľinela spravodľišagoha; o vladci vladňinena čačipnaha pro sudos.

² Sako lendar ela sar e skriša angle balvaj a sar e streškica andro baro brišind; ena sar o paňi, so čuľal pre pušťa, sar o ciňos tel e bari skala andre phuv, kaj hin baro tačipen.

³ O jakha olengre, ko dikhen, na ena zaphandle, a o kana olengre, ko šunen, šunena mištes.

⁴ Ola, ko hine siďarde, imar na ena a chudena te gondoľinel, so keren, a o šepetľiva imar vakerena žužes.

⁵ Le dilines imar na vičinena rajikano a le špekulantos imar na dena pačiv.

⁶ Se o dilino vakerel o diliňipen a andro jilo gondoľinel pro nalačho, hoj te kerel o nalačhipen a namištes te vakerel pro RAJ; le bokhales mukel bokhaha a le smednones na del te pijel.

⁷ O droma le špekulantoskre hine nalačhe; gondoľinel avri o nalačhe plani, hoj te zňičinel le čores le falošne lavenca pro sudos the akor, sar les hin čačipen.

⁸ Ale o pačivalo manuš gondoľinel pro pačivale plani a zorales ačhel paš oda, so hin pačivalo.

Le džuvľenge andro Jeruzalem

⁹ Džuvľale, so tumen pal ňisoste na starinen, ušťen a šunen miro vakeriben! Čhajale, so tumen ňisoha na trapinen, šunen mire lava!

¹⁰ Džuvľale bi o trapišagos, beršeha the vajkeci dživesenca izdrana daratar; bo o hroznos imar na ela a o uľipen pes imar na skidela upre.

¹¹ Džuvľale bi o starišagos, daran tumen a izdran! Čhiven tele o šukar gada a uren tumen andro gone.

¹² Maren tumen andro koľina žaľatar, bo o uľipnaskre maľi, o viňici

¹³ the e phuv mire manušengri zabarona le trňenca the le koľakenca. Roven vaš o khera, kaj sas pherdo radišagos, the vaš o foros, kaj sas pherdo dživipen.

¹⁴ O palacis ela omuklo, našľola e vika andro foros, e stražno veža pro brehos ačhela zamukľi pro furt; pašinena pes ode o stadi a ela pro radišagos le dzive somarenge,

¹⁵ medik pre amende na ela avričhido o Duchos andral o ňebos. Akor pes e pušťa čerinela pro ovocno sados a oda sados pes lela sar veš.

¹⁶ Pre odi pušťa ela o čačipnaskro sudos a andre oda sados o spravodľišagos.

¹⁷ A oda spravodľišagos anela o smirom, vašoda o manuša dživena andro smirom a šoha pes imar na darana le maribnastar.

¹⁸ Mire manuša peske bešena andro khera, kaj ela o smirom, dživena peske andro khera, kaj na ela dar, pro thana, kaj peske odpočovinena bi o starišagos.

¹⁹ Kajte o bare krupi zňičindehas o veš a o foros uľahas calkom zňičimen,

²⁰ tumen avena bachtale, tumen, ko sadzinen paš dojekh paňi a muken le volen the le somaren slobodnones te denašel.