Izajaš 15 - Le Devleskero Lav Andre Romaňi Čhib Slovensko 2021

O lav pro Moab

¹ O proroctvos pro Moab: O Ar andro Moab sas zňičimen, tel jekh rat sas čhido tele! O Kir andro Moab sas zňičimen, tel jekh rat sas čhido tele!

² O Dibon džal upre pro uče thana the andre peskro chramos te rovel; o Moab igen rovel pal o Nebo the Medeba; dojekh šero hino lango, dojekh brada hiňi hoľimen tele.

³ Pro uľici pes o manuša uren andro gada le gonestar; maškar o fori, pro padi savore manuša hikinen a peren tele andro roviben.

⁴ O Chešbon the o Elale viskinen a lengro hangos šunďol dži o Jahac, vašoda o moabika slugaďa daratar viskinen, sa andre lende izdral.

⁵ Miro jilo rovel vaš o Moab! Leskre manuša denašen dži paš o Coar; dži paš o Eglat-Šelišija. Bo rovibnaha džan upre brehoha andro Luchit; pro drom andro Choronajim bares roven, bo lengri phuv sas zňičimen.

⁶ O paňa andro Nimrim našľile a e čar šučiľa avri; na ačhile ňisave rastlini aňi ňič zeleno.

⁷ A oda, so ačhiľa le manušenge a so zachraňinde, peske ľidžan prekal e Virbengri jarka.

⁸ Lengri žaľa džalas dži pašal o Moaboskre hraňici, lengro hikišagos dži paš o Eglajim, lengro baro roviben šunďol dži paš o Beer-Elim.

⁹ Andro paňa le foroskre Dimon hin pherdo rat, ale mek the avke bičhavava pro Dimon buter pohromi – le ľevos bičhavava pre ola, ko pes zachraňinde andral o Moab, the pre ola, ko ačhile te dživel andre phuv.