Hozeaš 8 - Le Devleskero Lav Andre Romaňi Čhib Slovensko 2021

O RAJ odsudzinel le Izrael vaš o modlarstvo

¹ „Prithoven o trubi paš o muj! O orlos kružinel upral o kher le RAJESKRO, bo prephagle miri zmluva a ačhade pes pre miro zakonos.

² O Izrael ke ma vičinel: ‚Devla amaro, amen tut prindžaras!‘

³ Ale o Izrael odčhiďa oda, so hin lačho; vašoda pre leste džala o ňeprijaťeľis.

⁴ O manuša peske ačhade le kraľen, ale bijal mande; ačhade peske le rajen, ale mandar na phučle. Kerde peske o rupune the o somnakune modli pre peskri zahuba.

⁵ Me odčhiďom la Samarijakra somnakuňa gurumňora. Miri choľi pre lende labol! Našťi aven žuže? Mek dži kana?

⁶ Se the ola modla kerďa o manuš andral o Izrael. Oda nane Del! Ela phagerďi pro kotorora – odi somnakuňi gurumňi andral e Samarija!

⁷ Sadzinen e balvaj a skidena e vichrica! O klasos barola bi o zrnos, na kerela pes lestar ňisavo aro. A kajte pes lestar kerďahas aro, chana oda o cudzinci.

⁸ O Izrael hino zňičimen; akana hino maškar o narodi sar e phagerďi piri, savi ňiko na kamel.

⁹ Bo on gele andre Asirija sar o dzivo somaris, so phirel upre tele korkoro; o Efrajim peske cinelas le piranen.

¹⁰ Kajte peske cinelas le piranen andral o narodi, me len akana skidava upre pro sudos. Maj našavena e zor tel o pharipen le bare kraľiskro.

¹¹ O Efrajim peske ačhaďa but oltara pre obeta vaš o binos, no ola oltara leske ačhile o thana, kaj kerel o binos.

¹² Pisinďom lenge igen but veci andral miro zakonos, ale on len lenas sar vareso cudzo.

¹³ Kajte mange anen o obeti sar o daros a chan o mas le obetengro, le RAJESKE nane pre dzeka. Akana peske leperela pre lengro nalačhipen, marela len vaš o bini a džana pale andro Egipt.

¹⁴ O Izrael bisterďa pre peskro Stvoriťeľis a ačhavelas o palaca, o Juda kerďa but ohradzimen fori. Ale me pre lengre fori bičhavava e jag a zlabarela lengre hradi.“