Hozeaš 4 - Le Devleskero Lav Andre Romaňi Čhib Slovensko 2021

O RAJ obviňinel le Izrael

¹ Šunen o lav le RAJESKRO, Izraelitale! Bo o RAJ obviňinel le manušen, so dživen andre kadi phuv: „Nane ňiko verno aňi pačivalo andro kamiben, ňiko na prindžarel le Devles andre kadi phuv.

² Košen, klaminen, murdaren, čoren a keren o lubipen; o murdaripen pal o murdaripen, nane len imar ňisave hraňici.

³ Vašoda e phuv šučol avri a savoro, so andre dživel, našľol; o dziva džviri, o čirikle, a mek the o ribi andro moros meren.

⁴ Ňiko ňikas te na obviňinel aňi ňiko ňikas te na odsudzinel! Bo me obviňinav tumen le rašajen!

⁵ Tumen perena dživese a rači o proroka perena tumenca; vašoda zňičinava tumara da, le Izrael!

⁶ Mire manuša meren, bo man na prindžaren. Vašoda, hoj tumen odčhiďan o prindžaripen, me tumen odčhivava andral e rašajiko služba. Vašoda, hoj bisterďan pro zakonos tumare Devleskro, the me bisterava pre tumare čhave.

⁷ So buter rašaja sas, buter bini kerenas angle mande; čerinava lengri slava pre ladž!

⁸ Čaľon pro bini mire manušengre a kamen, hoj te keren o nalačhipen.

⁹ Vašoda avke, sar cerpinena o manuša, avke cerpinena the o rašaja: Marava sodujen vaš lengre droma a počinava lenge vaš lengre skutki.

¹⁰ Chana, ale na čaľona; kerena o lubipen, ale na ela len čhave, bo omukle le RAJES vaš o lubipen.

¹¹ E puraňi the e nevi mol lel e goďi mire manušendar.

¹² Mire manuša roden e rada paš e kaštuňi modla a vražinen peskre paľicenca, hoj pes te dodžanen so te kerel, bo o duchos le lubipnaskro len cirdel te lašarel avre devlen a oddžan le Devlestar.

¹³ Anen peskre obeti pro verchi, labaren o kaďidlos pro uče brehi tel o dubos, topoľis the cedros, kaj hin lačho ciňos. Vašoda tumare čhaja keren o lubipen a tumare borija nane pačivale.

¹⁴ Na marava tumare čhajen, hoj keren o lubipen, aňi tumare borijen, hoj nane pačivale; bo the o murša phiren pal o lubňa a anen o obeti le chramoskre lubňenca. O manuša, so na achaľon, ena zňičimen.

¹⁵ Te keres, Izraelona, o lubipen, te na avel odi vina the pro Juda. Ma džan andro Gilgal te lašarel falošňe, ma phiren andro Bet-Aven, ma len vera kavke: ‚Lav vera pro džido RAJ!‘

¹⁶ O Izrael hino zacato sar e zacato gurumňi. Šaj les akana o RAJ pašinel pre bari maľa sar le bakrores?

¹⁷ O manuša le Izraeloskre pes oddine le modlenge; muk len avke!

¹⁸ Sar dopijen e mol, džan te kerel o lubipen; lengre vladara kamen buter e ladž sar e slava.

¹⁹ E balvaj len pačarela andre peskre kridli a odphurdela; lengre obeti lenge anena e ladž.“