Hozeaš 14 - Le Devleskero Lav Andre Romaňi Čhib Slovensko 2021

¹ E Samarija ľidžala e vina, bo pes vzburinďa pre peskro Del. Lakre manušen murdarena la šabľaha, lakre čhaven rozpučinena pre phuv a le khabne džuvľen rozparinena.

O prorokos vičinel le Izrael te kerel pokaňje

² Visar tut pale ko RAJ, Izraelona, ke tiro Del, bo angle tire bini tuke poddžanas o pindre.

³ Len tumenca o lava, visaren tumen ko RAJ a phenen leske: „Odmuk amenge savore amare bini a prile amen lačhe jileha, hoj e chvala andral amaro muj tuke te el sar o biki pre obeta.

⁴ E Asirija amen na zachraňinela, na džaha te bešel pro graja a na phenaha ole vecenge, so kerďam amare vastenca: ‚Amare devla!‘, bo tu sal lačhejileskro ko široti.“

O Del pale požehňinela le Izrael

⁵ O RAJ phenel: „Anava mire manušen pale ke ma. Kamava len andral calo miro jilo, bo imar na som pre lende choľamen.

⁶ Avava sar e rosa le Izraeloske, rozkvitňisaľola sar e ľaľija a mukela o koreňa sar o cedri andro Libanon.

⁷ Barona leske o neve konara, ela šukar sar e oliva a voňinela sar o cedri andro Libanon.

⁸ O manuša pale bešena tel leskro ciňos a barona sar e pšeňica; kvitňisaľona sar o viňičis, lengri slava ela sar e libanoňiko mol.

⁹ Akor phenela o Efrajim: ‚So man chal le modlenca? Kamav te odphenel pre tiro kamiben, te dikhel mire jakhenca pre tute. Avke avava sar o smrekos furt zeleno, anava tiro ovocje.‘ “

¹⁰ Oda, ko hin goďaver, mi achaľol kale vecenge! Oda, ko mištes rozsudzinel, mi prindžarel len! O droma le RAJESKRE hine čače, o spravodľiva pal lende phiren, ale o binošna pre lende peren.