Hozeaš 12 - Le Devleskero Lav Andre Romaňi Čhib Slovensko 2021

¹ O Efrajim man obkľučinel le klamišagenca, o Izrael mange klaminel, the o Juda pes furt ačhavel pro Del, pro verno the sveto Del.

² O Efrajim pes čaľarel la balvajaha, calo džives denašel pal e vichodno balvaj, kerel furt buter klamišagos the mariben. Phandel e zmluva la Asirijaha a le Egiptoske bičhavel o olivovo olejos.

³ O RAJ del pro sudos le Juda; kamel te marel le Jakob vaš oda, sar dživel; te počinel leske vaš oda, sar kerel.

O Izrael mušinel te avel pale ko Del le Jakoboskro

⁴ Imar andro per peskra dake chudňa le phrales la petatar; marelas pes le Devleha peskra manušeskra zoraha;

⁵ marelas pes le aňjeloha a domarďa les; rovelas a mangelas peske o požehnaňje. Arakhľa les andro Betel a ode leha vakerelas –

⁶ le RAJEHA, le Nekzoraleder Devleha, leskro nav hin o RAJ!

⁷ Avke akana visar tut pale ke tiro Del, doľiker o verno kamiben the o spravodľišagos a užar furt pre tiro Del!

Zaslužinen peske o trestos

⁸ Le kupcas hin andro vasta o falošna vahi a rado klaminel.

⁹ O Efrajim phenďa: „Barvaľiľom, hin man igen but; a ňiko pre ma našťi phenel, hoj dochudňom o barvaľipen napačivales.“

¹⁰ Ale me som o RAJ, tiro Del, savo tut iľa avri andral o Egipt; pale tuke dava te bešel andro stani, sar varekana pro inepos le Stankengro.

¹¹ Vakeravas ko proroka, davas len but viďeňja a vakeravas prekal lende andro podobenstva.

¹² Hin andro Gilead e modloslužba? Ola manuša ena zňičimen! Obetinenas le biken andro Gilgal? Lengre oltara ena sar o bara pre kopa pre orimen maľa!

¹³ O Jakob denašľa andre phuv Aram; o Izrael služinelas, hoj te dochudel la romňa; vaš e džuvľi stražinelas o stadi.

¹⁴ Prekal o prorokos o RAJ iľa avri le Izrael andral o Egipt a prekal o prorokos les stražinelas.

¹⁵ O Efrajim igen choľarďa le RAJES, vašoda les mukela andre vina vaš oda rat, so čhorďa avri, a leskro Raj leske visarela pale e ladž, so kerďa.