4. Mojžišoskro 34 - Le Devleskero Lav Andre Romaňi Čhib Slovensko 2021

Le Izraeloskre hraňici

¹ O RAJ phenďa le Mojžišoske:

² „Le Izraelitenge prikazin kada: ‚Sar avena andro Kanaan, andre phuv, so chudena sar ďeďictvos, ena ode kala hraňici:

³ Pro juhos chudena kotor la pušťatar Sin paš e hraňica le Edomoskri. Pre vichodno sera chudela e hraňica paš o južno agor le Londe moroskro

⁴ a džala dureder pro juhos le verchengre dromestar Akrabim, odarik ko Sin a odarik pro juhos le Kadeš-Barneatar, paľis ko Chacar-Adar a dži ko Acmon.

⁵ Le Acmonostar pes visarela ko paňi Egipt a odarik džala dži paš o Stredozemno moros.

⁶ Tumari zapadno hraňica ela o brehos le Stredozemne moroskro.

⁷ Tumari severno hraňica džala le Stredozemne morostar dži ko verchos Hor

⁸ a odarik dureder dži ko Lebo-Chamat a the ko Cedad,

⁹ paľis prekal o Zifron dži ko Chacar-Enan. Oda ela tumari severno hraňica.

¹⁰ Tumari vichodno hraňica džala le severostar tele andral o Chacar-Enan ko Šefam,

¹¹ odarik džala tele ke Ribla a pro vichodos le Ajinostar dži paš o verchi pro vichodos paš o Galilejsko moros,

¹² paľis tele pašal o Jordan dži paš o Londo moros. Oda ela calo hraňica pašal tumari phuv.‘ “

¹³ Paloda o Mojžiš diňa le Izraelitenge kada prikazis: „Prekal o losos tumenge rozďelinen sar ďeďictvos kadi phuv, so o RAJ prikazinďa te del le eňa the jepaš kmeňenge.

¹⁴ Bo o kmeňi Ruben the Gad the o jepaš kmeňos Menaše imar peskri phuv chudle

¹⁵ pro vichodos le Jordanostar anglo Jericho.“

O vodci, save rozďelinena e phuv

¹⁶ O RAJ phenďa le Mojžišoske:

¹⁷ „Kala džene tumenge rozďelinena e phuv: O rašaj Eleazar the o Jozua, le Nunoskro čhavo.

¹⁸ Andral dojekh kmeňos kide avri po jekh vodcas, hoj lenge te pomožinen te rozďelinel e phuv.“

¹⁹ Kala manuša sas: andral o kmeňos Juda o Kaleb, le Jefunoskro čhavo;

²⁰ andral kmeňos Šimeon o Šemuel, le Amichudoskro čhavo;

²¹ andral o kmeňos Benjamin o Elidad, le Kislonoskro čhavo;

²² andral o kmeňos Dan o Buki, le Jogliskro čhavo;

²³ andral o kmeňos Menaše o Chaniel, le Efodoskro čhavo;

²⁴ andral o kmeňos Efrajim o Kemuel, le Šiftanoskro čhavo;

²⁵ andral o kmeňos Zebulun o Elicafan, le Parnachoskro čhavo,

²⁶ andral o kmeňos Jisachar o Paltiel, le Azanoskro čhavo;

²⁷ andral o kmeňos Ašer o Achihud, le Šelomiskro čhavo;

²⁸ andral o kmeňos Naftali o Pedahel, le Amichudoskro čhavo.

²⁹ Kala hine o murša, savenge o RAJ prikazinďa, hoj te rozďelinen le Izraelitenge e phuv Kanaan sar ďeďictvos.