3. Mojžišoskro 3 - Le Devleskero Lav Andre Romaňi Čhib Slovensko 2021

Pal e smiromoskri obeta

¹ „ ‚Te vareko kamel te anel o daros le RAJESKE pre smiromoskri obeta le gurumňendar, mi anel le bikos abo la gurumňa, pre save nane chiba.

² Thovela o vast pro šero le džviroske, saves anďa te obetinel, a murdarela les paš o vudar paš o Svetostankos. O rašaja, o čhave le Aronoskre, pokropinena leskre rateha o seri pro oltaris.

³ Le smiromoskra obetatar anela le RAJESKE sar jagaľi obeta o žiros andral o per, savoro žiros, so hin pro andrune kotora,

⁴ soduj ľadvini le žiroha, so hin pre lende, the o lalokos la pečinkakro, so lela avri jekhetane le ľadvinenca.

⁵ O čhave le Aronoskre kada savoro labarena pro oltaris la labarďa obetaha, so imar labol pro kašta. Kada hin e jagaľi obeta, so šukares voňinel le RAJESKE.

⁶ Te vareko kamel te anel le RAJESKE sar e smiromoskri obeta le stadostar, mi obetinel le samcos abo la samica bi e chiba.

⁷ Te anela te obetinel le bakrores, anela les anglo RAJ,

⁸ thovela o vast pro šero ole džviroske a murdarela les anglo Svetostankos. O čhave le Aronoskre pokropinena leskre rateha o seri pro oltaris.

⁹ Le smiromoskra obetatar anela le RAJESKE sar jagaľi obeta o žiros, calo žirošno chvostos, so odčhinela dži paš o paluno kokalos, the savoro žiros, so hin pro andrune kotora the pašal lende,

¹⁰ soduj ľadvini le žiroha, so hin pre lende, the o lalokos la pečinkakro, so lela avri jekhetane le ľadvinenca.

¹¹ O rašaj kada savoro labarela pro oltaris. Kada hin o chaben pre jagaľi obeta le RAJESKE.

¹² Te kamela te obetinel koza, anela la anglo RAJ.

¹³ Thovela o vast pre lakro šero a murdarela la anglo Svetostankos. O čhave le Aronoskre pokropinena lakre rateha o seri pro oltaris.

¹⁴ Paľis olestar anela o daros pre jagaľi obeta: o žiros, so hin pro andrune kotora le džviroskre the pašal lende,

¹⁵ soduj ľadvini le žiroha, so hin pre lende, the o lalokos la pečinkakro, so lela avri jekhetane le ľadvinenca.

¹⁶ O rašaj oda labarela pro oltaris. Kada hin o chaben pre jagaľi obeta, so šukares voňinel. Savoro žiros hin le RAJESKRO.

¹⁷ Kada prikazis hin pro furt prekal savore tumare pokoleňja všadzik, kaj bešena: Našťi chan ňisavo žiros aňi rat.‘ “