2. Mojžišoskro 38 - Le Devleskero Lav Andre Romaňi Čhib Slovensko 2021

O oltaris pro labarde obeti

¹ Paľis le akacijoskre kaštestar kerďa oltaris pro labarde obeti. Sas kerdo andre kocka 220 centimetri džinďardo the buchlo a sas 130 centimetri učo.

² Upral pre leskre rohi kerďa aver štar rohi, ajse sar hin le biken. O rohi the o oltaris sas jekhe kotorestar a sas obthodo le brondzoha.

³ Kerďa the savoro sersamos paš o oltaris le brondzostar: o bare čare prekal o prachos, o lopati, o cikne čare, o vidli the o cikne lopatki pro angara.

⁴ Kerďa brondzuňi rošta a thoďa la andral tel e obruba maškar o oltaris.

⁵ Pašal lakre rohi kerďa štar brondzune kružki, hoj o dručki pes te del te thovel andre.

⁶ O dručki kerďa le akacijoskre kaštestar a obcirdňa len le brondzoha.

⁷ O dručki zaispidľa andro kružki pal soduj seri le oltariskre, hoj pes te prehordinel. Kerďa o oltaris le deskendar sar phundraďi truhla.

⁸ Iľa o gendali le džuvľendar, save služinenas paš o vudar andro Svetostankos, a lengre brondzostar kerďa e bari nadoba le podstavcenca.

E dvora pašal o Svetostankos

⁹ Kerďa e dvora pašal o Svetostankos. Pre južno dvorakri sera kerďa lepedi le sane pochtanestar; jekh sera sas džinďarďi saranda the štar (44) metri

¹⁰ le biš (20) slupenca pro biš brondzune podstavci. O hački the o maškarune tički ko slupi sas rupune.

¹¹ Avke the pre severno sera sas biš slupi pro biš brondzune podstavci. O hački the o maškarune tički ko slupi sas rupune.

¹² Pre zapadno dvorakri sera sas o lepedi bišuduj (22) metri džinďarde the deš slupi pro deš podstavci. O hački the o maškarune tički ko slupi sas rupune.

¹³ E angluňi dvora pro vichodos sas tiš bišuduj metri buchľi.

¹⁴ Pre jekh sera paš o vudar sas o lepedi 660 centimetri džinďarde a sas pro trin slupi a pro trin podstavci.

¹⁵ Avke the pre aver sera paš o vudar sas o lepedi 660 centimetri džinďarde, a sas pro trin slupi pro trin podstavci.

¹⁶ Savore lepedi pašal e dvora sas kerde le sane pochtanestar.

¹⁷ O podstavci tel o slupi sas brondzune a o hački, uprune kriti the o tički ko slupi sas rupune. Savore avrune the andrune slupi sas spojimen le rupune tičkenca.

¹⁸ E lepeda pro vudar sas kerďi le sane side pochtanestar la belava, fijalova the ľoľa vlnatar. Sas džinďarďi eňa metri a uči duj metri, ajse sar o lepedi pre dvora.

¹⁹ E lepeda sas thoďi pro štar brondzune slupi, so sas pro štar brondzune podstavci. O hački, o uprune kriti the o maškarune dručki sas obthode le rupoha.

²⁰ Savore koľiki, so sas zamarde andre phuv pašal o Svetostankos the pašal e dvora, sas le brondzostar.

O veci pro Svetostankos

²¹ Kade hin pisimen o zoznamos le materjaloskro, savo kampelas pro Svetostankos, savo o Mojžiš prikazinďa te kerel le Levitenge, saven ľidžalas o Itamar, o čhavo le rašaskro le Aronoskro.

²² O Becaleel, saveske sas dad o Uri a papus o Chur andral o kmeňos Juda, kerďa savoro, so o RAJ prikazinďa le Mojžišoske.

²³ Sas leha o Oholiab, le Achisamachoskro čhavo andral o kmeňos Dan. Ov sas majstros andre peskri buči a džanelas šukares te sivel avri o sane pochtana la fijalova, ľoľa the purpurova vlnaha.

²⁴ Savoro somnakaj, so sas dino le RAJESKE prekal o Svetostankos, sas 1 tona pal oda, sar pes važinel andro Svetostankos.

²⁵ Sar sas zgende o manuša, oda rup, so dine, sas 3,43 toni pal oda, sar pes važinel andro Svetostankos.

²⁶ Dojekh, ko sas zgendo, počinelas jekh minca: jepaš šeklos. Sas zgende 603 550 murša, kaske sas buter sar biš (20) berš.

²⁷ Le 3,4 toni rupoha kerde o šel (100) podstavci prekal o Sveto than the prekal o pochtan. Jekh podstavcos važinelas 34 kili.

²⁸ Okle 30 kilendar o Becaleel kerďa o hački, o kriti the o maškarune tički prekal o slupi.

²⁹ O brondzos, so ande le RAJESKE, sas 2,425 toni.

³⁰ Lestar kerďa o podstavci prekal o Svetostankoskro vudar, o oltaris, e rošta the o sersamos prekal o oltaris,

³¹ o podstavci prekal o slupi pašal e dvora the paš e brana, the savore koľiki.