2. Mojžišoskro 26 - Le Devleskero Lav Andre Romaňi Čhib Slovensko 2021

O lepedi prekal o Svetostankos

¹ „O Svetostankos kereha le deše lepedendar, so ena kerde le sane pochtanendar la fijalova, ľoľa the purpurova vlnatar, pre save o majstros šukares sivela le cheruben.

² Dojekh lepeda ela dešuduj (12) metri džinďarďi a duj metri buchľi. Avke ena kerde savore lepedi.

³ Pandž lepedi ena zaside jekhetane a aver pandž tiš. Avke lendar ena duj bare lepedi.

⁴ Pro agor jekha bara lepedake prisiveha fijalova kružki. Kada kereha the pre jekh agor pre dujto bari lepeda.

⁵ Siveha penda (50) kružki pro agor jekha lepedake the pro agor dujta lepedake avke, hoj o kružki te aven jekh angle aver.

⁶ Ker penda somnakune čati, savenca sphandeha o bare lepedi avke, hoj o Svetostankos ela jekh.

⁷ O Svetostankos upral zaučhareha la lepedaha, so ela kerďi la kozakra srsťatar. Kajse lepedi kereha dešujekh (11)

⁸ a dojekh ela dešutrin (13) metri džinďarďi a duj (2) metri buchľi.

⁹ Paľis ole lepedendar zasiveha pandž jekhetane a aver šov tiš zasiveha jekhetane, avke lendar ena duj bare lepedi. Sar zaučhareha o Stanos, šovto lepeda anglo Stanos prethoveha pro jepaš.

¹⁰ Siveha penda (50) kružki pro agor jekha bara lepedake, a aver penda siveha pro agor dujta bara lepedake.

¹¹ Ker penda brondzune čati; o čati thov andro kružki a lenca prichudeha paš peste o lepedi.

¹² Oda, so ačhela buter la dujta bara lepedatar, mi el figimen pre paluňi sera le Svetostankoskri.

¹³ E Stanoskri lepeda ela 55 centimetri buchleder sar o Stanos a ačhela te figinel pal soduj seri a avke zaučharela calo Svetostankos.

¹⁴ Ker aver duj lepedi, hoj pes lenca o Stanos te učharel andre. Ešebno kereha le baranoskra cipatar, so ela farbimen pro loles, a upral late ela e lepeda le tuleňiskra cipatar.“

O rami prekal o Svetostankos

¹⁵ „Kereha o rami le akacijoskre kaštestar prekal o Svetostankos.

¹⁶ Dojekh ramos ela 4 metri džinďardo a 66 centimetri buchlo.

¹⁷ Kereha duj jednaka kaštune rameni, so hine zachudle jekhetane le maškarune kaštorenca. Pre savore rami ena kala rameni.

¹⁸ Ker biš (20) rami prekal e južno sera.

¹⁹ Prekal ola biš rami ker saranda (40) rupune podstavci – duj tel dojekh ramos prekal leskre duj pindre.

²⁰ The prekal e severno sera ker biš rami

²¹ the saranda rupune podstavci – duj tel dojekh ramos.

²² Kereha šov rami prekal e paluňi sera pro zapados

²³ a paš oda kereha mek duj rami pro rohi pre paluňi sera.

²⁴ Mušinen te el prephandle andre peste le kružkenca telunestar dži upre. Kavke len kereha a thoveha pro soduj rohi.

²⁵ Savore rami pre paluňi sera ena ochto a ena thode pro dešušov (16) rupune podstavci – duj tel dojekh ramos.

²⁶ Le akacijoskre kaštestar kereha o druki prekal o Svetostankos: pandž pre severno sera,

²⁷ pandž pre južno sera a pandž pre zapadno paluňi sera.

²⁸ Maškaruno drukos predžala prekal o maškar le ramenge a oda jekhe Svetostankoskre agorestar dži ke aver.

²⁹ O rami obcirdeha le somnakaha a kereha upre somnakune kružki, andre save pes thovena o druki, so ena tiš obcirdle le somnakaha.

³⁰ O Svetostankos kereha pal oda planos, so tuke sikaďom pro verchos.“

O veci andro Svetostankos

³¹ „Kereha the o pochtan la fijalova the ľoľa the purpurova vlnatar, pre save o majstros šukares sivela le cheruben.

³² Figineha les pro štar somnakune slupi le akacijoskre kaštestar. The o hački upre ela somnakune. O slupi ačhena pro štar rupune podstavci

³³ a o pochtan figin pro hački, hoj te odďelinel o Sveto than le Neksveteder thanestar a pal leste thoveha e archa la zmluvakri le duje barune tablenca.

³⁴ Andro Neksveteder than zaučhareha e archa lakre kritoha.

³⁵ Anglo Neksveteder than thoveha o skamind pre severno sera a o svietňikos pre južno sera.

³⁶ Anglo than, sar pes džala andro Stanos, kereha o pochtan la fijalova, ľoľa the purpurova vlnatar a upre siveha šukar veci.

³⁷ Hoj te figines oda pochtan, kereha pandž slupi le akacijoskre kaštestar a obcirdeha len le somnakaha a kereha upre the o hački le somnakastar. Kereha prekal o slupi pandž podstavci le brondzostar.“