2. Kronicko 17 - Le Devleskero Lav Andre Romaňi Čhib Slovensko 2021

O Jošafat kraľinel upral e Judsko

¹ Pal o Asa ačhiľa kraľiske leskro čhavo, o Jošafat. Ov zoraľarďa peskro kraľišagos anglo Izrael.

² Andre savore ohradzimen judska fori rozačhaďa slugaďen. Rozačhaďa partiji slugaďen the avrether andre Judsko the andro efrajimika fori, save domarďa leskro dad o Asa.

³ O RAJ sas le Jošafatoha, bo phirelas pal o ešebna droma le Davidoskre, peskre dadeskre a na lašarelas le Baalen.

⁴ Ale služinelas peskre dadeskre Devleske, doľikerelas leskre prikazaňja a na kerelas sar o izraelika kraľa anglal leste.

⁵ Vašoda o RAJ zoraľarďa leskro kraľišagos a savore manuša andral e Judsko leske anenas dari. Avke ačhiľa barvalo the slavno.

⁶ Ov sas pačivalo andre služba le RAJESKE a zňičinďa andre Judsko savore modlengre thana pro lašariben the la Ašerakre slupi.

⁷ Andro trito berš, sar kraľinelas, bičhaďa kale uradňiken andro judska fori, hoj te sikaven le manušen o zakonos le RAJESKRO: le Ben-Chajil, le Obadiah, le Zecharijah, le Netaneel the le Michajah.

⁸ Lenca sas the o Leviti Šemajah, Netanijah, Zebadijah, Asahel, Šemiramot, Jonatan, Adonijah, Tobijah, Tob-Adonijah the o rašaja Elišamas the Joram.

⁹ Ile peha o zakonos le RAJESKRO, prephirde savore judska fori a sikavenas le manušen.

¹⁰ Pro narodi, save sas pašal e Judsko, avľa bari dar le RAJESTAR, avke ňiko lendar na džalas pro mariben pro Jošafat.

¹¹ A varesave Filišťinci anenas le Jošafatoske dari the počinenas leske daň. O Arabi leske anenas efta ezera the efta šel (7 700) capen the bakren.

¹² O Jošafat sas furt zoraleder. Andre Judsko ačhaďa ohradzimen fori the o fori le skladenca,

¹³ kaj odthovenas but chaben. Ľikerelas andro Jeruzalem le nekfeder slugaďen,

¹⁴ save sas rozďelimen andro partiji pal peskre fajti. Andre Judsko o veľiťeľa upral o ezeros sas: o Adnah le 300 000 zorale slugaďenca,

¹⁵ dujto o Jochanan le 280 000 slugaďenca

¹⁶ a trito o Amasiah le Zichriskro čhavo, savo korkoro pestar geľa andre služba le RAJESKRI, le 200 000 slugaďenca.

¹⁷ Andral o Benjamin: o Eljadas, o zoralo slugaďis, le 200 000 slugaďenca le lukenca the šťitenca

¹⁸ a dujto o Jehozabad le 180 000 vizbrojimen slugaďenca.

¹⁹ Kala služinenas le kraľiske andro Jeruzalem a mek the aver slugaďa, saven rozačhaďa andro ohradzimen fori pal caľi judsko phuv.