Yohaana 18 - EKITABO EKIRIKWERA BAIBULI N'EBITABO EBY'OMUBONANO APOKURUFA/DYUTROKANONIKO

¹ Yesu ku yaaherize kugamba ebyo, yaagyenda n'abatendekwa be, yaayambuka akagyera ka Kedirooni; okwo hakaba hariyo omusiri, yaaguzamu n'abatendekwa be.

² Yuda owaamureebize akaba naamanya ogwo mwanya, ahabw'okuba kaingi Yesu akaba ateeranirayo n'abatendekwa be.

³ Mpaho yaija omuri ogwo mwanya ayebembeire ekimbuuro ky'abaserukare hamwe n'abarinzi abaayohereziibwe abahongyerezi abakuru n'Abafarisaayo, bakwaitse amatabaza n'emuri n'eby'okurwanisa.

⁴ Yesu, ahabw'okumanya byona ebirikwenda kumubaho, arugayo ababuuza ati: Nimusherura oha?

⁵ Bamugarukamu bati: Yesu owa Nazareeti. Abagira ati: Manya niinye. Obwo Yuda owaamureebize akaba ayemereire nabo.

⁶ Yesu ku abagira ati: Niinye; bagarura ebigyere enyima, bagwa ahansi.

⁷ Agaruka ababuuza ati: Nimusherura oha? Bati: Yesu owa Nazareeti.

⁸ Yesu abagira ati: Manya naabagira nti: Niinye. Ku muraabe niinye murikusherura, murekye aba bagyende.

⁹ Ekyo akakigamba kuhikiiriza eki yaagambire, naagira ati: Abu wankwatsize, tindaburize n'omwe.

¹⁰ Simooni Petero, owaabaire aine rurara, agisyorayo, atema omuheereza w'omuhongyerezi omukuru, amucwaho okutu kwa buryo. Ogwo muheereza akaba naayetwa Maliko.

¹¹ Yesu agira Petero ati: Garura rurara yaawe omu kyobate kyayo; noogira ngu tindi w'okunywa ekikopo ki Taata yampaire?

Yesu omu maisho g'omuhongyerezi omukuru

¹² Omutwe gw'abaserukare n'omukuru waabo, hamwe n'abarinzi Abayudaaya, baakwata Yesu, baamuboha.

¹³ Baabanza kumutwara owa Anasi; ahabw'okuba akaba ari ishezaara wa Kayaafa, owaabaire ari omuhongyerezi omukuru omuri ogwo mwaka.

¹⁴ Kayaafa ogwo niwe yaabaire ahabwire Abayudaaya ati: Ni kirungi omuntu omwe okufeera abantu boona.

Petero okwoga Yesu

¹⁵ Simooni Petero hamwe n'omutendekwa ondi baakurata Yesu. Kandi ogwo mutendekwa, ahabw'okumanywa omuhongyerezi omukuru, ataaha na Yesu omu kibuga ky'omuhongyerezi omukuru.

¹⁶ Kwonka Petero we aguma ayemereire aheeru y'eirembo. Omutendekwa, owaabaire naamanywa omuhongyerezi omukuru, nikwo kushohora, akagambira omwishiki omukumiirizi, akataasya Petero omunda.

¹⁷ Ogwo mwishiki omukumiirizi nikwo kubuuza Petero ati: Naiwe ori ow'omu batendekwa b'ogwo mushaija? Onu ati: Tindi w'omuribo.

¹⁸ Obwo hakaba hariho embeho, abaheereza n'abarinzi bahembire omuriro gw'amakara, beemereire niboota; Petero nawe nikwo kwemerera akoota nabo.

Anasi okubuuza Yesu

¹⁹ Omuhongyerezi omukuru abuuza Yesu aha by'abatendekwa be, n'eby'okwegyesa kwe.

²⁰ Yesu amugarukamu ati: Nkaba ngambira abantu boona butunu; nyegyeseza omu iteeraniro n'omuri Nyaruju, ahu Abayudaaya boona bateeraniire; tinkagambaga kintu kyona omu mubonano.

²¹ Mbwenu nyowe nombuuriza ki? Buuza abarahuriire ebi naayegyeise; nibo barikumanya ebi naagambire.

²² Ku yaagambire ebyo, omwe aha barinzi abaabaire beemereire aho, yaamuteera oruhi, yaamugira ati: Haza ogarukamu otyo omuhongyerezi omukuru?

²³ Yesu amugarukamu ati: Ku ndaabe naagamba kubi, nyomesereza eki naashobya; kwonka ku kiraabe kitariho, wanteerera ki?

²⁴ Bwanyima Anasi amwohereza abohirwe, ahari Kayaafa, omuhongyerezi omukuru.

Petero okugaruka kwoga Yesu

²⁵ Simooni Petero, ku yaabaire ayemereire naayota, baamubuuza bati: Naiwe ori ow'omu batendekwa be? Ayehakana naagira ati: Tindi w'omuribo.

²⁶ Omwe aha baheereza b'omuhongyerezi omukuru, oine obuzaare n'omushaija ou Petero yaatemireho okutu, agira ati: Tinaakureeba ori nawe omu musiri?

²⁷ Petero agaruka ayehakana; ahonaaho enkoko egamba.

Yesu omu maisho ga Pilaato

²⁸ Mpaho baiha Yesu owa Kayaafa, bamutwara omu kikaari ky'omutegyeki omukuru, obwo nibutaagurikana. Kwonka bo tibaataaha muri ekyo kikaari, ngu kitakaabahagaza, bakabura kurya Obugyenyi bw'Okuhingurwaho.

²⁹ Pilaato nikwo kushohora, akabashanga aheeru, akababuuza ati: Omushaija ogu nimumutabaariza ki?

³⁰ Bamugarukamu bati: Kuri atari nkozi y'ebibi titwakumukureeteire.

³¹ Pilaato ati: Nimwirooko nu, mumutware, mumucwere orubanja nk'oku eiteeka ryanyu riri. Abayudaaya bamugarukamu bati: Itwe titurikwikirizibwa kwita muntu.

³² Ekyo kikahikiiriza ebi Yesu yaagambire naamanyisa oku arifa.

³³ Pilaato atyo agaruka omu kikaari, ayeta Yesu, amubuuza ati: Weeza ori Omugabe w'Abayudaaya?

³⁴ Yesu agarukamu ati: Ekyo waakibuuza ahabwawe, nainga hariho abandi abakungambiire?

³⁵ Pilaato ati: Nyowe shi ndi Omuyudaaya? Ab'eihanga ryawe hamwe n'abahongyerezi abakuru, ka nibo baakundeetera. Okozire ki?

³⁶ Yesu amugarukamu ati: Manya obugabe bwangye ti bw'ensi egi. Obugabe bwangye kuri buri obw'ensi egi, engabo zangye zikaarwaine, ndeka kurekurirwa Abayudaaya; kwonka obugabe bwangye kunu tiyo bukomooka.

³⁷ Pilaato agira ati: Nikwo kugira nu, ngu ori omugabe? Yesu agarukamu ati: Waakigamba ku ndi omugabe, eki naazaariirwe kandi ekyandeetsire omu nsi n'okuhamya amazima. Ow'amazima weena ahurira eiraka ryangye,

³⁸ Pilaato ati: Amazima n'enki? Ku agamba ekyo, agaruka ashohora, ashanga Abayudaaya, abagira ati: Nyowe tindikureeba kirikusingisa omuntu ogu orubanja.

Yesu okushungisibwa n'okucwerwa Pilaato orubanja

³⁹ Kwonka nk'oku omucwe gwanyu guri, nshangwa mbarekurira embohe emwe aha kiro ky'Obugyenyi bw'Okuhingurwaho; mbwenu nimwenda mbarekurire Omugabe w'Abayudaaya?

⁴⁰ Ku bahurira ekyo, bayomba nibagira bati: T'ogu, kureka Baraba. Baraba ogwo akaba ari omwambuzi.