Matayo 6 - EKITABO EKIRIKWERA BAIBULI N'EBITABO EBY'OMUBONANO APOKURUFA/DYUTROKANONIKO

¹ Mwerinde, murekye kukora eby'okuhikiirira byanyu omu maisho g'abantu, ngu babareebe; ku muraakore mutyo, Shoimwe ori omu iguru taribaha bihembo.

² N'ahabw'ekyo ku oraagume waagabira abooro, orekye kukirangirira nk'oku endyarya zigira omu mateeraniro n'omu bihandagazi, ngu zibone kusiimwa abantu. Buzimazima nimbagambira nti: Ziba zaatungire ebihembo byazo.

³ Ku oraabe noogabira abooro, omukono gwawe gwa bumosho gurekye kumanya eki ogwa buryo gurikukora,

⁴ okugaba kwawe kubone kuba okw'omu mubonano, na Shoimwe oreeba eby'omu mubonano aryakuha ebihembo.

Oku omuntu ashemereire kushaba

⁵ Kandi ku muraabe nimushaba Ruhanga, mutariba nk'endyarya ezikunda kushaba zeemereire omu mateeraniro n'omu nteeraniro z'emihanda, ngu zibone kureebwa abantu. Buzimazima nimbagambira nti: Ziba zaatungire ebihembo byazo.

⁶ Mbwenu ku oraaze kushaba, otaahe omu kishengye kyawe, okingye orwigi, oshabe Shoimwe ow'omu mubonano; kandi Shoimwe ogwo oreeba eby'omu mubonano, aryakuha ebihembo.

Eshaara ya Mukama waitu

⁷ Haza ku muraabe nimushaba Ruhanga, murekye kurandagatana nk'oku Abanyamahanga bagira. Manya bo bateekateeka ngu nibaija kuhurirwa ahabw'ebigambo byabo bingi.

⁸ Mutaba nkabo; ahabw'okuba Shoimwe aba naamanya ebi murikwetenga mutakamushabire.

⁹ Mugume nu mushabe muti: Tataitwe ow'omu iguru, eiziina ryawe ritiinwe;

¹⁰ obukama bwawe bwije; ebi okunda bikorwe omu nsi, nk'oku bikorwa omu iguru.

¹¹ Otuhe eri izooba egabo yaitu y'obutoosha.

¹² Otusaasire ebibi byaitu, nkaitwe okutusaasira abatushaagiza.

¹³ Otatureka tukoohibwa, kureka otujune Omubi.

¹⁴ Manya ku murisaasira abantu ebibi byabo, naimwe Shoimwe ow'omu iguru aryabasaasira;

¹⁵ kwonka ku muriba mutasaasiire bantu bibi byabo, na Shoimwe ow'omu iguru taribasaasira byanyu.

Eby'okuteeyoreka nitwesiibyakwo

¹⁶ Kandi ku muryesiibyakwo, mutariiririmba ahamaisho nk'endyarya, ahabw'okuba zeekokootsa ahamaisho, ngu abantu bareebe oku zeesiibizekwo. Buzimazima nimbagambira nti: Ziba zaatungire ebihembo byazo.

¹⁷ Kwonka iwe, ku oraayesiibyekwo, guma oyesiigye amajuta omu mutwe, onaabe ahamaisho,

¹⁸ abantu barekye kumanya ku oyesiibizekwo, kureka kimanywe Shoimwe ow'omu mubonano; kandi Shoimwe ogwo, oreeba eby'omu mubonano, aryakuha ebihembo.

Eitungo ry'amazima

¹⁹ Mutaryebiikira eitungo omu nsi, ei ebiyenje n'omukyereenyo birisiisira, n'ei abashuma bafumurira, bakariiba;

²⁰ kureka mwebiikire eitungo omu iguru, ei ebiyenje nari omukyereenyo bitarisiisira, n'ei abashuma batafumurira bakariiba.

²¹ Manya ahu eitungo ryawe riri, n'omutima gwawe niho guba.

Eriisho niryo rumuri rw'omubiri

²² Eriisho niryo rumuri rw'omubiri. N'ahabw'ekyo eriisho ryawe ku riba rihuriire, omubiri gwawe gwona gubugwa okuhweza;

²³ kwonka eriisho ryawe ku riba rirwaire, omubiri gwawe gwona gutimba omwirima. Mbwenu shi, okuhweza okukurimu ku kuraabe kuri omwirima, omwirima ogwo ka ni mwingi!

Okuteemereza mutima, kureka okwesiga Ruhanga

²⁴ Tihariho obaasa kuheereza abakama babiri; ahabw'okuba aryayangaho omwe, akunde ondi; nari aryahamira ahari omwe, agaye ondi. Manya timurikubaasa kuheereza Ruhanga kandi n'eitungo.

²⁵ Nikyo ndikugambirira nti: Mutaryemerereza omutima eby'amagara gaanyu, ebi muraarye, nari ebi muraanywe, nainga eby'emibiri yaanyu ebi muraajware. Mbwenu shi, amagara tigarikukira ebyokurya, n'omubiri tigurikukira ebijwaro?

²⁶ Mureebere aha nyonyi z'omu kaabunga; tizibiba, tizigyesha, kandi tizihunika mu bitara, haza kunu Shoimwe ow'omu iguru aziriisa. Mbwenu imwe timurikuzikira?

²⁷ Omuriimwe hariho owaakubaasa kwongyera aha myaka y'amagara ge, nobu yaakwemereza omutima ata?

²⁸ Mbwenu nimwemerereza ki omutima ahabw'eby'okujwara? Muteekateekye aha birabyo by'omu ishwa oku bikura; tibikora mirimo kandi tibyogosha.

²⁹ Manya nimbagambira nti: Nangwa na Solomooni, omu kitiinwa kye kyona, taraizihiirwe bijwaro nka kimwe aharibyo.

³⁰ Mbwenu Ruhanga ku araabe ajweka atyo obunyaatsi bw'omu ishwa, oburiho eri izooba nyencakare bukanagwa omu kikoomi, kaashwa imwe bantu 'mwe, abaine okwikiriza kukye!

³¹ N'ahabw'ekyo mutaryemereza omutima nimugira muti: Turyarya ki? nari: Turyanywa ki? nainga: Turyajwara ki?

³² Manya ebyo byona nibyo Abanyamahanga baitanira; kandi Shoimwe ow'omu iguru naamanya ku murikubyetenga byona.

³³ Mbwenu mubanze mumarire omutima aha by'obukama bwe n'aha bi arikwenda; haza ebyo byona biryabongyerwaho.

³⁴ N'ahabw'ekyo mutaryemerereza omutima ebya nyencakare, ahabw'okuba nyencakare eryayeyemerereza yonka omutima. Reka buri kiro kihwe n'amaganya gaakyo.