2 Abakorinso 12 - EKITABO EKIRIKWERA BAIBULI N'EBITABO EBY'OMUBONANO APOKURUFA/DYUTROKANONIKO

¹ Ndi ow'okwehimbisa, nobu kuraabe kutaine mugasho, kwonka ka mpikye aha by'okworekwa n'okushuuruurirwa Mukama.

² Nimmanya omuntu Omukristo, owaatwairwe omu iguru rya kashatu emyaka ikumi n'ena ehingwire yaaba yaabaire ari omu mubiri nari atagurimu, shinta, Ruhanga niwe arikukimanya.

³ Kandi nimmanya ogwo muntu ku yaatwairwe omu mwanya gw'obunanukye yaaba ari omu mubiri nari atagurimu, shinta, Ruhanga niwe arikukimanya;

⁴ haza akahurirayo ebigambo ebitarikubaasa kushoboororwa, kandi ebi omuntu atakaagamba.

⁵ Ahabw'omuntu ogwo niinyija kwehimbisa, kwonka ahabwangye tindikwehimbisa, kureka okwehimbisiza omu maani gangye makye.

⁶ Nobu naakwehimbisa, tinkaaba mushema, ahabw'okuba nimba ningamba amazima. Kwonka ka nkirekye, hatakaagira owanteekateekaho okukira ebi andeebamu, nari ebi ampuriraho.

⁷ Kandi okugira ngu ndekye kwetunguura ahabw'okushuuruurirwa kwingi okw'omutaano, nkateebwa eihwa omu mubiri, riri entumwa ya Sitaane, kuguma nirincumita, ngu ndekye kwetunguura okukira oku kinshemereire.

⁸ Nkeeshengyereza Mukama kashatu ngu rinkuukyemu.

⁹ Kwonka yangira ati: Obubangizi bwangye nibukumara; ahabw'okuba amaani gangye gahikiiririzibwa omu bweremwa. Nikyo ndigumira niinyehimbisa nshemereirwe ahabw'obweremwa bwangye, amaani ga Kristo gabone kungumamu.

¹⁰ N'ahabw'ekyo ahabwa Kristo nimmarirwa omu bweremwa, omu kujumwa, omu birikungumira, omu kuhiiganisibwa n'omu bihikiirizi. Manya ku mba ndi omweremwa, nibwo mba ow'amaani.

Eby'okutataho mutima

¹¹ Eego, mbaire ndi omushema! Kwonka niimwe mwakingyemire. Manya niimwe mwakubaire ab'okunsiima ahabw'okuba nobu ndaabe ntaine ku ndi, hoona ezindi ntumwa rugambwa tiziine ki zirikunkiza n'akakye.

¹² Obumanyiso obw'entumwa nyakabara bukakorerwa omuriimwe omu kugumisiriza kwingi, omu kukora eby'obumanyiso n'eby'okutangaaza n'eby'amaani.

¹³ Mbwenu ni kintu ki eki mutarahairwe nk'ebindi bigombe by'abaikiriza, kureka eky'okugira ngu nyowe tindabaremereire? Munsaasire okwo kutainganisa.

¹⁴ Mbwenu nyeteekateekire kwija owaanyu omurundi gwa kashatu; kandi tindikwija kubanyuunyuuta, ahabw'okuba ebyanyu tibyo ndikwizirira, kureka niimwe ndikwizirira. Manya abaana tibo bashemereire kubiikira abazaire baabo eby'okubahwera, kureka abazaire nibo babibiikira abaana.

¹⁵ Nyowe ndyaguma mpeyo ebyangye, kandi naanye nyeheereyo kimwe ahabwanyu nshemereirwe. Mbwenu ei ndagaarukire kubakunda munonga, niyo muraagarukire kunkunda kakye?

¹⁶ Nimwikiriza ngu nyowe tindabaremereire; kwonka kandi mugira ngu nkaba omunyabwengye naabagobeza, naabahita.

¹⁷ Mbwenu imwe omuri abo abu naabatumireho, hariho eki naabaryangataniise?

¹⁸ Nkeehanangiriza Tito kwija okwo, kandi naayohereza mwene waitu kugyenda nawe. Mbwenu Tito aine eki arabaryangataniise? Titurakozire n'omutima gumwe? Tituratwarize nka kuri?

¹⁹ Ebyo omwanya ogu gwona mubaire nimuteekateeka ngu nitwetonganira omu maisho gaanyu? Abakundwa, mumanye ngu byona ebi turikugamba, tubigambira omu maisho ga Ruhanga, nk'oku Kristo yaakubigambire ahabw'okubagasira.

²⁰ Eki ndikutiina n'okwija shana nkabashanga muri nk'oku mutarikwenda. Obundi shana mukaashangwa mwine entongane, eihari, ekiniga, okuharikana, okubeihererana, okugambuurana, amaryo n'okujagarara.

²¹ Kandi nintiina, ngu ku ndiija okwo obundi, Ruhanga wangye aryancwa amaryo omu maisho gaanyu, mbe ow'okucurira baingi abaakozire ebibi; bakanga kwegarukamu kureka obushambani n'ebikwatiraine nabwo, n'okurya enshoni ahabw'ebi baabaire bakora.