1 Petero 4 - EKITABO EKIRIKWERA BAIBULI N'EBITABO EBY'OMUBONANO APOKURUFA/DYUTROKANONIKO

¹ Nk'oku Kristo yaabonabonesiibwe omu mubiri, naimwe mwegumye mwine omutima nk'ogwe. Manya weena obonabona omu mubiri aba atakikora bibi,

² ngu abone kumara ebiro bye ebitsigaire akiine omubiri, atakitegyekwa kwetenga okubi okw'abantu, kureka ebi Ruhanga akunda.

³ Omu biro byahingwire mukamara omwanya muraingwa munonga nimukora ebi Abanyamahanga bakunda. Mukaba mwine emitwarize y'ebikwatiraine n'obushambani, n'okworobera okwetenga okubi okw'omubiri, n'obusinzi, n'okuraara enkyeera, n'okuramya ebishushani okurikuzira.

⁴ Nikitangaaza abo Banyamahanga kureeba hati mutarikukwatanisa nabo omu by'okwetaanyagura kutyo, nikyo barikubajumira.

⁵ Bo baryayetonganira ahari Ogwo oyeteekateekire kucwera abahuriire n'abafiire orubanja.

⁶ Nikyo Amakuru Marungi gaarangiririirwe n'abaafiire, ngu nobu baacwereirwe orubanja omu mubiri nk'abantu, kwonka bagume bari abahuriire omu mutima nka Ruhanga.

Okukoresa gye ebiconco bya Ruhanga

⁷ Emperu ya byona eri haihi. N'ahabw'ekyo mugume mwerinzire nimwebarira, mubone kubaasa kushaba Ruhanga.

⁸ Okukira byona, mugume nimukundana mutarikuhararukana, ahabw'okuba rukundo eshwekyerera ebibi bingi.

⁹ Mukunirane mutarikunyomwa.

¹⁰ Nk'oku buri omwe yaahairwe ekiconco, mubihweresane nk'abaakwatsiibwe okugaba emigisha ya Ruhanga etari emwe.

¹¹ Weena oine eky'okugamba, agambe ebi Ruhanga amushuuruuriire. Weena orikuheereza, aheereze n'amaani agu Ruhanga amuhaire, omuri byona Ruhanga abone kuhimbisizibwa omuri Yesu Kristo, oheebwa ekitiinwa n'obutegyeki ebiro byona. Amiina.

Okubonabonesibwa nk'Omukristo

¹² Abakundwa, mutatangaazibwa omuriro ogurikubagyeza, mukaba nk'abaagwerwa akagwe.

¹³ Haakiri mushemererwe, ahabw'okuba mukwataniise na Kristo omu kubonabona kwe. Reero ekitiinisa kye ku kirishuuruurwa, nabwo mubone kushemererwa n'okunanuka.

¹⁴ Ku muraajumwe ahabw'eiziina rya Kristo, mwine omugisha; ahabw'okuba Mutima ow'ekitiinwa, Mutima wa Ruhanga, ari ahariimwe.

¹⁵ Kwonka hatarigira n'omwe omuriimwe owaabonabonesibwa ahabw'okwita, nari okwiba, nari okukora bibi, nainga okwetaasya omu by'abandi;

¹⁶ kureka oraabonabonesibwe ahabw'okuba Omukristo, arekye kwitwa enshoni. Haakiri ahimbise Ruhanga, ahabw'okwetwa eryo iziina.

¹⁷ Manya obunaku buhikire okucwa orubanja okutandikira aha b'omu nju ya Ruhanga. Mbwenu ku kuraabe niitwe kuraabandizeho, abo abatarikwikiriza Makuru Marungi ga Ruhanga baryashura ki?

¹⁸ Nk'ekyahandiikirwe oku kirikugira kiti: Ohikiriire ku araabe naagumirwa okujunwa, otarikutiina Ruhanga n'omusiisi baryaba bata?

¹⁹ N'ahabw'ekyo ababonabona nk'oku Ruhanga asiimire, bagume nibakora gye, kandi bakwatse amagara gaabo Omuhangi omwesigwa.