1 Abakorinso 5 - EKITABO EKIRIKWERA BAIBULI N'EBITABO EBY'OMUBONANO APOKURUFA/DYUTROKANONIKO

¹ Nikigambwa hoona, ku omuriimwe harimu omucwe gw'obushambani, kandi obw'omuringo ogutashangwa nangwa n'omu bakaafiiri; omushaija okushwera muka ishe.

² Haza mwehimbisa! Timushemereire kushaasha? Omuntu okozire ekyo kintu n'ow'okucuubwa.

³ Nyowe nobu ndaabe ntari hamwe naimwe omu mubiri, ndi hamwe naimwe omu mutima. Kandi nk'ori naimwe,

⁴ omu iziina rya Mukama Yesu, ogwo muntu okozire ekyo kihagaro mperize kumucwera orubanja. Ku muraateerane, naanye nimba ndi hamwe naimwe omu mutima hamwe n'amaani ga Mukama waitu Yesu,

⁵ ogwo muntu mumurekurire Sitaane, omubiri gwe guhwerekyerere, amagara ge g'omutima gabone kujunwa aha Kiro kya Mukama Yesu.

⁶ Okwehimbisa kwanyu tikuhikire. Timurikumanya ku akatumbisa kakye katumbisa eisyanga ryona?

⁷ Mweihemu ekitumbisa ekya ira, mubone kuba eisyanga risya; manya timurimu kitumbisa. Ahabw'okuba, Kristo Omwana gw'Entaama gw'Okuhingurwaho kwaitu akatambwa.

⁸ N'ahabw'ekyo ka tugume tugire omugyenzo gw'obugyenyi obwo, tutaine kitumbisa ekya ira, ekitumbisa eky'eitima n'obubi; kureka emigaati etatumbisiibwe, etarimu buryarya kandi ey'amazima.

⁹ Nkabahandiikira omu baruha yangye ku mutashemereire kukwatanisa n'abakora eby'obushambani;

¹⁰ ntarikugira ngu abashambani b'ensi egi, nari abanyamururu n'abanyagi, nainga abaramya ebitari Ruhanga, ahabw'okuba ku kyakuba kityo mukaaba ab'okuruga omu nsi.

¹¹ Kwonka eki naabahandiikiire n'okutakwatanisa na weena oyetwa omunyaruganda, ku araabe ari omushambani, omunyamururu, orikuramya emandwa, omujumi, omusinzi nari omunyagi nobu kwakuba okurya n'omuntu nk'ogwo.

^12-13 Mbwenu shi n'ekyangye kucwera ab'aheeru orubanja? Ruhanga niwe arirubacwera. Kwonka shi imwe timushemereire kucwera ab'omu kigombe kyanyu orubanja? Mwihe omuriimwe ogwo muntu mubi.