Zacarias 7 - Ti Baro a Naimbag a Damag Biblia

Babalawen ni Yahweh ti Saan a Naimpusoan a Panagayunar

¹ Iti maikapat a tawen a panagturay ni Dario a kas emperador, iti maikapat nga aldaw iti maikasiam a bulan a maaw-awagan iti Kislev, adda impakaammo kaniak ti Apo.

² Imbaon dagiti taga-Betel ni Sarezer ken ni Regemmelek agraman dagiti tattaoda a mapan iti Templo ti Apo a Mannakabalin-amin tapno dumawatda iti bendision ti Apo.

³ Pinasaludsodda daytoy kadagiti papadi ken profeta: “Itultuloymi kadi a dung-awan ti pannakadadael ti Templo babaen iti panagayunar iti maikalima a bulan a kas iti inar-aramidmi iti adu a tawen agingga ita?”

⁴ Daytoy ti sao ti Apo a naipakaammo kaniak:

⁵ “Ibagam kadagiti tattao iti pagilian ken kadagiti papadi, a no agayunar ken agdung-awda idi iti maikalima ken maikapito a bulan iti las-ud dagitoy pitopulo a tawen, saan a kas pammadayawda kaniak.

⁶ Ket idi nangan ken imminumda, nagpaay laeng iti bukodda a pagragsakan.”

⁷ Daytoy ti imbaga ti Apo babaen dagiti profeta idi un-unana. Imbagana daytoy idi narang-ay ti Jerusalem ken adu ti agnaed a tao, saan laeng a kadagiti kabangibangna nga il-ili no di pay ket iti abagatan a deppaar ken iti akinlaud a bakras dagiti turod.

Naitalaw dagiti Tattao gapu iti Kinasukirda

⁸ Inted ni Yahweh daytoy a mensahe ken ni Zacarias:

⁹ “Idi un-unana, impaulogko dagitoy a bilin kadagiti tattaok: ‘Kitaenyo a maipakat ti hustisia ken ipakitayo ti ayat ken asiyo iti padayo a tao.

¹⁰ Diyo idadanes dagiti balo, dagiti ulila, dagiti ganggannaet a makipagnaed kadakayo ken ti siasinoman nga adda pakasapulanna. Ket dikay agpanggep kadagiti pamuspusan a mangdangran iti padayo a tao.’

¹¹ “Ngem saan a kinayat dagiti tattaok ti dumngeg. Sinerraanda dagiti panunotda

¹² ket pinatangkenda dagiti pusoda a kas iti bato. Gapu ta dida impangag dagiti pannursurok nga intedko babaen kadagiti profeta idi un-unana, nakapungtotak iti kasta unay.

¹³ Gapu ta didak impangag, diak met impangag dagiti kararagda.

¹⁴ Kaslaak la bagio a nangipalais kadakuada ket nawarawarada a nagnaed kadagiti nadumaduma a pagilian. Pinaglangalang dagita a nasion daytoy nasayaat a daga ket awan ti nabati nga agnaed.”