Zacarias 4 - Ti Baro a Naimbag a Damag Biblia

Ti Parmata maipapan iti Kandelero

¹ Immay manen ti anghel a nakisasao kaniak ket riniingnak a kasla ket matmaturogakon.

² “Ania ti makitam?” sinaludsodna. “Makitak ti maysa a kandelero a pasig a balitok,” insungbatko. “Iti rabawna, adda malukong a pagyanan ti lana. Adda pito a pagsilawan ti kandelero, tunggal maysa adda pagsaadan ti pito a pabelo.

³ Adda dua a kayo nga olibo iti abay ti kandelero, maysa iti tunggal sikigan.”

⁴ Sinaludsodko iti anghel, “Ania ti kaipapanan dagitoy, apo?”

⁵ “Dimo kad ammo?” sinaludsodna. “Saan, apo,” insungbatko.

^10b Kinuna kaniak ti anghel, “Dagiti pito a pagsilawan isuda dagiti pito a mata ti Apo a kumitkita iti entero a daga.”

¹¹ Sinaludsodko, “Ania ti kaipapanan dagiti kayo ti olibo iti agsumbangir a sikigan ti kandelero?

¹² Ket ania ti kaipapanan dagitoy dua a sanga ti olibo iti abay dagiti balitok a tubo a pagayusan dagiti lana ti olibo?”

¹³ “Dimo kad ammo?” sinaludsodna. “Saan, apo,” kinunak.

¹⁴ “Dagitoy dagiti dua a lallaki a pinili ken kinonsagrar ti Dios nga agserbi kenkuana nga Apo ti entero a daga,” kinunana.

Ti Kari ti Dios ken ni Zerubbabel

⁶ Imbaga ti anghel nga ipakaammok ken ni Zerubbabel daytoy a mensahe ti Apo: “Agballigika, saan nga iti bileg ti armada wenno iti bukodmo a pigsa no di ket babaen iti pannakabalin nga aggapu kaniak.

⁷ Mapukawto dagiti lapped a kas iti kadadakkel dagiti bantay. Bangonemto manen ti Templo ket inton ikabilmo ti maudi a bato, idir-into dagiti tattao, ‘Nagpintasen! Nagpintasen!’”

⁸ Adda sabali a mensahe nga imbaga kaniak ti Apo.

⁹ Kinunana, “Insaad ni Zerubbabel ti fondasion ti Templo ket leppasennanto ti patakder. Inton mapasamak daytoy, maammoanto dagiti tattao a siak ti nangibaon kenka a mapan kadakuada.

^10a Maupayda gapu ta bassit ti nagapuanan. Ngem maragsakandanto inton makitada ni Zerubbabel a mangitultuloy a mangbangon iti Templo.”