Zacarias 3 - Ti Baro a Naimbag a Damag Biblia

Ti Parmata ti Profeta maipapan iti Nangato a Padi

¹ Iti sabali a parmata, impakita kaniak ti Apo ni Josue a Nangato a Padi a sitatakder iti sangoanan ti anghel ti Apo. Sitatakder met ni Satanas iti abay ni Josue tapno idarumna.

² Kinuna ti anghel ti Apo ken ni Satanas, “Dusaennaka koma ti Apo, Satanas. Sapay koma ta dusaennaka ti Apo a mangay-ayat iti Jerusalem. Mayarig daytoy a lalaki iti kayo a narabsut iti apuy.”

³ Sitatakder sadiay ni Josue a narugit ti pagan-anayna.

⁴ Kinuna ti anghel kadagiti nailangitan nga agserserbi kenkuana, “Uksobenyo ti narugit a pagan-anay daytoy a lalaki.” Kalpasanna, kinunana ken ni Josue, “Inikkatkon dagiti basolmo, ket ikkanka iti baro a pagan-anay nga ikawesmo.”

⁵ Binilinna dagiti agserserbi a mangikabilda iti nadalus a turban iti ulo ni Josue. Nagtungpalda sada kinawesan ni Josue iti baro a pagan-anay bayat ti panagtakder sadiay ti anghel ti Apo.

⁶ Kalpasanna, imbaga ti anghel ken ni Josue,

⁷ a kastoy ti kinuna ti Apo a Mannakabalin-amin: “No agtulnogka kadagiti lintegko ket aramidem dagiti pagrebbengam nga intedko kenka, sikanto ti mangimaton iti Templok ken kadagiti paraanganna. Ipangagkonto dagiti kararagmo a kas iti panangipangagko iti kararag dagiti angheles nga adda iti imatangko.

⁸ Dumngegka ngarud, Josue, sika a Nangato a Padi. Dumngegkayo met, dakayo a kakaduana a padi. Dakayo ti pagilasinan ti naimbag a masakbayan: Iparangarangkon ti adipenko a maaw-awagan ‘Ti Sanga.’

⁹ Ikabilko iti sangoanan ni Josue ti maysa a bato a pito ti parupana. Addanto balikas nga ikitikitko iti bato ket iti las-ud ti maysa la nga aldaw, punasek ti basol daytoy a daga.

¹⁰ Inton dumteng dayta nga aldaw, agbiagkayto a natalged ken narang-ay, ket tunggal maysa addanto kaubasan ken kaigosanna a pangawisanna kadagiti kaarrubana.”