Zacarias 13 - Ti Baro a Naimbag a Damag Biblia

¹ Kuna ni Yahweh a Mannakabalin-amin, “Inton dumteng dayta a tiempo, addanto ubbog a maluktan nga agpaay kadagiti kaputotan ni David ken dagiti tattao iti Jerusalem tapno maugasan ti basol ken kinarugitda.

² Iti dayta a tiempo, pukawekto dagiti imahen iti pagilian, ket awanton ti makalagip kadakuada. Paksiatekto dagiti agkuna a profetada ket pukawek ti tarigagay nga agdaydayaw kadagiti didiosen.

³ No addanto pay laeng mangipapilit nga agipadto, kunanto dagiti nagannak kenkuana a masapul a matay ta imbagana a nagsao iti nagan ni Yahweh ngem pasig met nga ulbod ti insaona. No agipadto, patayento dagiti mismo a nagannak kenkuana.

⁴ Inton dumteng dayta a tiempo, awanto ti profeta a mangipalangguad kadagiti parmatana wenno agkawes wenno agparang a kas profeta tapno allilawenna dagiti tattao.

⁵ Ngem kunananto, ‘Saanak a profeta. Maysaak a mannalon. Nagtaltalonak manipud pay idi ubingak.’

⁶ Ket no adda agsaludsod, ‘Ania ngarud dagitoy sugat iti barukongmo?’ isungbatnanto, ‘Naalak iti balay ti gayyemko.’”

Maibilin ti Pannakapapatay ti Pastor ti Dios

⁷ Kuna ni Yahweh a Mannakabalin-amin: “Tumakderka, kampilan, ket darupem ti agpaspastor a katulongak. Papatayem tapno mawarawara dagiti karnero. Darupek dagiti tattaok

⁸ ket iti entero a daga, duanto nga apagkatlo kadagiti tattao ti matay.

⁹ Paglasatekto iti apuy dagiti nakalasat nga apagkatlo. Gugorakto ida a kas iti pannakagugor ti pirak iti apuy. Gugorakto ida a kas iti pannakagugor ti balitok. Kalpasanna, agkararagdanto kaniak ket ipangagkonto ida. Ibagakto kadakuada nga isuda dagiti tattaok ket ipudnodanto a siak ti Diosda.”