Zacarias 11 - Ti Baro a Naimbag a Damag Biblia

Maparmek dagiti Nadangkok nga Agturay

¹ Luktam dagiti ruanganmo, O Libano, tapno sumrek ti apuy a manguram kadagiti kayo a sedro a kukuam.

² Agdung-awkayo, dakayo a saleng, ta natuangen dagiti sedro, napukanen dagiti nadayag a kayo. Agdung-awkayo, dakayo a lugo ti Basan, nadadaelen ti nasamek a kabakiran.

³ Agsangit iti nasaem dagiti agtuturay; napukawen ti dayagda. Denggenyo ti ngernger dagiti leon; ta nadadaelen ti bakir ti Jordan.

Dagiti Dua nga Agpaspastor

⁴ Kinuna kaniak ti Apo a Diosko, “Agakemka a kas pastor ti arban ti karnero a nairanta a maparti.

⁵ Partien ida dagiti akinkukua ket dida madusa. Ilakoda ti karne ket kunada, ‘Madaydayaw ti Apo! Nabaknangkamin!’ Uray dagiti mismo a mangipaspastor kadakuada, dida kaasian ida.” (

⁶ Kinuna ti Apo, “Diak kaasianen dagiti agnaed iti daga. Siak a mismo ti mangyawat iti tunggal tao iti pannakabalin ti agturay ken arina. Dadaelento dagitoy nga agtuturay ti daga ket awanto ti ikanawak iti pannakabalinda.”)

⁷ Tinangdanandak dagiti gimmatang ken naglako kadagiti karnero. Nagbalinak a pastor dagiti karnero a nairanta a maparti. Nangalaak iti dua a sarukod. Pinanaganak ti maysa iti “Parabur” ket ti sabali iti “Timpuyog” ket inaywanak ti arban.

⁸ Iti las-ud ti maysa a bulan, pinapanawko dagiti tallo nga agpaspastor a nanggura kaniak ta napukawko ti anusko kadakuada.

⁹ Kalpasanna, kinunak iti arban, “Saanen a siak ti mangipastor kadakayo. No adda matay, bay-ak a matay. No adda madadael, bay-ak a madadael. Dagiti matda, bay-ak nga agiinnibusda.”

¹⁰ Tinukkolko ti sarukodko a maaw-awagan iti “Parabur,” kas pakakitaan a nawaswas ti nagtulagan ti Apo ken dagiti amin a nasion.

¹¹ Ngarud, nawaswas ti tulag iti dayta nga aldaw. Kitkitaendak dagiti aggatgatang ken dagiti aglaklako iti karnero ket ammoda a sao amin ti Apo dagitoy.

¹² Kinunak kadakuada, “No mayatkayo, itedyo ti tangdanko; no saan, bay-anyo.” Tinangdanandak iti 30 a bagi ti pirak.

¹³ Kinuna ti Apo kaniak, “Ikabilmo ti kuarta iti kaha ti Templo.” Innalak dagiti 30 a bagi ti pirak, ti dakkel a gatad nga impagarupda a kaibatogan ti pategko, ket inkabilko iti kaha ti Templo.

¹⁴ Kalpasanna, tinukkolko ti maikadua a sarukod a maaw-awagan iti “Timpuyog,” ket nadadael ti timpuyog ti Juda ken ti Israel.

¹⁵ Kalpasanna, kinuna ti Apo kaniak, “Agbalinka manen nga agpaspastor ngem ita, kas maysa nga awan serserbina.

¹⁶ Nangdutokak iti pastor a mangaywan iti arbanko, ngem dina met tulongan dagiti karnero nga agpeggad iti pannakadadael. Dina pay biroken dagiti napukaw, wenno agasan dagiti nasugatan, wenno pakanen dagiti nasalun-at. Sidaenna ketdi dagiti kalukmegan a karnero ket lapgisenna dagiti kukoda.

¹⁷ Nakabutbutengto ti pagbanagan dayta awan serserbina a pastor! Binaybay-anna ti arbanna. Dadaelento a mamimpinsan ti gubat ti pannakabalinna. Magangonto ti takkiagna ket agbulsekto ti makannawan a matana.”