Zacarias 10 - Ti Baro a Naimbag a Damag Biblia

Ikari ni Yahweh ti Pannakaisalakan

¹ Agdawatkay iti tudo iti Apo iti panawen nga awan ti tudo. Ti Apo ti mangibaon iti ulep a mangitinnag iti tudo ken arbis, a mangpalangto kadagiti talon nga agpaay iti tunggal maysa.

² Makiuman dagiti tattao kadagiti imahen ngem minamaag ken ulbod ti sungbat a maited kadakuada. Adda dagiti mangipatarus iti tagtagainep ngem yaw-awandaka. Ubbaw ti pangliwliwada. Iti kasta, agalla-alla dagiti tattao a kasla napukaw a karnero. Maparigatda gapu ta awan ti mangipangulo kadakuada.

³ Kuna ti Apo, “Kapungtotko dagiti pastor, ket dusaekto dagiti papangulo, ta siak, ni Yahweh a Mannakabalin-amin, ay-ayatek dagiti tattao ti Juda. Pagbalinekto ida a nabileg a kabalio a pakigubat.

⁴ Tumadto kadakuada ti bato a pasuli ti pasok ti tolda ti bai a pakigubat ken amin nga agtuturay.

⁵ Mamaingeldanto a mannakigubat a mangibaddebaddek kadagiti kabusorda kadagiti kalsada. Makirangetdanto ta adda ni Yahweh kadakuada ket parmekendanto dagiti nagkabalio a kabusorda.

⁶ “Papigsaekto dagiti tattao ti Juda; ispalekto dagiti Israelita. Kaasiakto ida, ket yawidkonto amin ida. Kaslanto diak linaksid ida. Siak ni Yahweh a Diosda, sungbatakto dagiti kararagda.

⁷ Napigsanto dagiti Israelita a kasla soldado, naragsakdanto a kasla nakainum iti arak. Malagipto dagiti kaputotanda daytoy a balligi, ket agragsakdanto gapu iti inaramid ni Yahweh.

⁸ “Ayabakto dagiti tattaok ket ummongekto ida. Ispalekto ida ket paaduekto ida a kas iti sigud a kaaduda.

⁹ Uray no inwarawarak ida kadagiti pagilian, malagipdakto latta iti adayo a daga. Makalasatdanto agraman dagiti annakda ket agkukuyogdanto nga agawid.

¹⁰ Alaekto ida idiay Egipto ken Asiria, ket pagnaedekto ida iti bukodda a daga. Pagnaedekto met ti dadduma idiay Galaad ken Libano agingga a mapno ti daga kadagiti tattao.

¹¹ Inton aglasatda iti taaw ti rigatda, siak, ni Yahweh, ablatakto dagiti dalluyon, ket agmaganto ti lansad ti Karayan Nile. Maipababanto ti Asiria ket mapukawto ti Egipto ti bilegna.

¹² Papigsaekto dagiti tattaok; agdaydayaw ken agtulnogdanto kaniak.” Ti Apo ti nagsao iti daytoy.