Zacarias 1 - Ti Baro a Naimbag a Damag Biblia

Ibaga ni Yahweh kadagiti Tattaona nga Agsublida Kenkuana

¹ Daytoy ti mensahe ti Apo nga impakaammona ken ni profeta Zacarias iti maikawalo a bulan iti maikadua a tawen a panagturay ni Dario a kas emperador ti Persia. (Ni Zacarias ti anak ni Barakias ken apoko ni Iddo.)

² Imbaga ti Apo a Mannakabalin-amin ken ni Zacarias nga ipakaammona daytoy kadagiti tattao, “Siak, ni Yahweh, kasta unay idi ti pungtotko kadagidi kapuonanyo.

³ Ngem ita, kunak kadakayo, ‘Agsublikayo kaniak ket agsubliak met kadakayo.

⁴ Diyo tuladen dagidi kapuonanyo. Idi un-unana, impakaammo kadakuada dagiti profeta ti saok. Binallaaganda ida nga idiandan dagiti dakes ken managbasol a panagbiagda. Ngem didak impangag wenno tinungpal.

⁵ Ita, natayen dagidi kapuonanyo ken dagiti profeta.

⁶ Babaen kadagiti adipenko a profeta, nangtedak kadagiti kapuonanyo kadagiti ballaag ken bilin. Saanda a nangikaskaso ket sinagabada ti dusa ti kinasukirda. Nagbabawida met laeng ket binigbigda a dinusak ida kas maikari kadakuada ken kas inkeddengko nga aramiden.’”

Ti Parmata maipapan kadagiti Kabalio

⁷ Iti maikadua a tawen a panagturay ni Dario a kas emperador, iti maika-24 nga aldaw iti maika-11 a bulan (ti bulan ti Sebat), imbaga kaniak ti Apo daytoy a mensahe iti maysa a parmata iti rabii.

⁸ Nakitak ti maysa nga anghel ti Apo a nagsakay iti nalabaga a kabalio. Nagsardeng iti ummong dagiti nasamek a kayo iti maysa a tanap. Iti likudanna, adda dagiti sabali pay a kabalio—nalabaga, puraw ken garitgaritan.

⁹ “Ania ti kaipapanan dagitoy a kabalio, apo?” sinaludsodko. “Ipakitak kenka no ania ti kaipapanan dagitoy,” insungbatna.

¹⁰ “Imbaon ti Apo ida tapno wanawananda ti daga.”

¹¹ Impadamagda daytoy iti anghel, “Sinursormi ti entero a daga ket nasarakanmi nga awan ti arimekmekna ken awan gaway dagiti tattao.”

¹² Kinuna ti anghel, “O Apo a Mannakabalin-amin, 70 a tawenen a kapungpungtotmo ti Jerusalem ken dagiti siudad ti Juda. Kaanonto a kaasiam ida?”

¹³ Makaliwliwa ken makaabbukay dagiti balikas nga insungbat ti Apo iti anghel.

¹⁴ Ket imbaga kaniak ti anghel nga ipakaammok ti sao ti Apo a Mannakabalin-amin: “Ipatpategko unay ti Jerusalem ket mariribukak iti nasantoan a siudadko.

¹⁵ Napalalo ti pungtotko kadagiti pagilian nga agnamnam-ay iti kappia ken talna. Idi medmedmedak ti pungtotko kadagiti tattaok, dinegdegan dagitoy a nasion ti panagsagabada.

¹⁶ Ngarud, nagsubliak iti Jerusalem tapno kaasiak ti siudad. Mabangonto manen ti Templok ket matarimaan manen ti siudad.”

¹⁷ Imbaga pay ti anghel nga ipakaammok daytoy: “Kuna ti Apo a Mannakabalin-amin a rumang-ayto manen dagiti siudadna. Liwliwaennanto manen ti Jerusalem ket pagbalinennanto manen ti siudad a kukuana.”

Ti Parmata maipapan kadagiti Sara

¹⁸ Iti sabali a parmata, nakitak ti uppat a sara.

¹⁹ Sinaludsodko iti anghel a makisasao kaniak no ania ti kaipapananda. Insungbatna, “Iladawanda dagiti nabileg a pagilian ti lubong a nangwarawara kadagiti tattao ti Juda, Israel ken Jerusalem.”

²⁰ Kalpasanna, impakita ti Apo kaniak ti uppat a mammanday a siiiggem kadagiti martilio.

²¹ Sinaludsodko no ania ti umayda aramiden. Insungbatna, “Immayda tapno butbutngen ken parmekenda dagiti pagilian a nangparukma a namimpinsan iti daga ti Juda ken nangwarawara kadagiti tattaona.”