Tito 2 - Ti Baro a Naimbag a Damag Biblia

Naimbag a Pannursuro

¹ Ngem no maipapan kenka, masapul nga isurom laeng ti mayannurot iti naimbag a pannursuro.

² Patigmaanam dagiti lallakay: Masapul a managparbeng, manakem ken maiturayanda ti bagida. Nasalun-atda iti pammati, iti ayat ken iti panagibtur.

³ Kasta met a patigmaanam dagiti babbaket: Agbiagda koma kas mayannurot iti nasantoan a panagbiag. Masapul a saanda a mamadpadakes wenno mammartek. Masapul a naimbag ti isuroda

⁴ tapno masursuroan dagiti ub-ubing a babbai nga agayat kadagiti assawada ken kadagiti annakda.

⁵ Managteppel ken nadalusda, naimbag a managtagibalay ken paiturayanda kadagiti lallakayda tapno awan agsao iti maibusor iti mensahe ti Dios.

⁶ Patigmaanam met dagiti agtutubo a lallaki a masapul nga agparbengda.

⁷ Iti amin a banag, sika ti ulidan ti naimbag nga aramid. Iti panangisurom, ipakitam a napudno ken napasnekka.

⁸ Aramatem dagiti sao nga awan pakababalawanna tapno mabainan dagiti kabusortayo iti kaawan ti dakes a masaoda kadatayo.

⁹ Ibagam kadagiti tagabu nga agtulnogda kadagiti appoda ket ikagumaanda a maragsakanda kadakuada iti aniaman nga aramidenda. Dida supringen

¹⁰ wenno takawan ida, ngem ipakitada ketdi a napudno ken mapagtalkanda, tapno iti amin nga aramidenda, idayawda ti pannursuro maipapan iti Dios a Mangisalakan kadatayo.

¹¹ Ta impakitan ti Dios ti paraburna nga agpaay iti pannakaisalakan ti sangkataoan.

¹² Isuronatayo dayta a parabur a mangiwaksi iti dakes a panagbiag ken kadagiti nailubongan a tarigagay. Iti kasta, agbiagtayo a naparbeng, nalinteg ken nadiosan iti agdama a tiempo

¹³ bayat ti panaguraytayo iti nagasat nga Aldaw a namnamaentayo, inton agparang ti dayag ni Jesu-Cristo a naindaklan a Dios ken Mangisalakan kadatayo.

¹⁴ Inyawatna ti biagna gapu kadatayo tapno isalakannatay iti amin a kinadakes ket pagbalinennatayo a nadalus a tattao nga agpaay kenkuana ken napasnek nga agaramid iti naimbag.

¹⁵ Isurom dagitoy, ket usarem ti amin a turaymo a mangpatigmaan ken mangbabalaw kadagiti agdengngeg kenka. Dimo ipalubos a maikkat ti panagraemda kenka.