Paltiing 5 - Ti Baro a Naimbag a Damag Biblia

Ti Nalukot a Pagbasaan ken ti Kordero

¹ Iti kannawan nga ima ti nakatugaw iti trono, nakitak ti maysa a nalukot a pagbasaan a nasuratan iti agsumbangir ket naserraan iti pito a timbre.

² Ket nakitak ti maysa a mannakabalin nga anghel a nangipakaammo iti napigsa a timek: “Siasino ti maikari a mangikkat kadagiti timbre ken mangukrad iti nalukot a pagbasaan?”

³ Ngem awan sadi langit wenno iti lubong iti baba wenno iti uneg ti daga ti makalukat ken mangkita iti linaon ti pagbasaan.

⁴ Nagsangitak iti nasaem agsipud ta awan ti nasarakan a maikari a manglukat wenno mangkita iti pagbasaan.

⁵ Iti kasta, kinuna kaniak ti maysa kadagiti panglakayen: “Dika agsangit. Kitaem, nagballigi ti Leon a nagtaud iti tribu ti Juda, ti naindaklan a kaputotan ni David, ket naikkan iti kalintegan a mangikkat kadagiti pito a timbre ken mangukrad iti nalukot a pagbasaan.”

⁶ Kalpasanna, nakitak ti maysa a Kordero nga agtaktakder iti tengnga ti trono a linikmut dagiti uppat a sibibiag a parsua ken dagiti panglakayen. Kasla napapatay ti Kordero. Pito ti sarana ken addaan iti pito a mata nga isu dagiti pito nga espiritu ti Dios nga imbaonna iti entero a lubong.

⁷ Napanna innala ti pagbasaan iti makannawan nga ima ti nakatugaw iti trono.

⁸ Bayat ti panangalana, nagruknoy dagiti uppat a sibibiag a parsua ken dagiti duapulo ket uppat a panglakayen iti sangoanan ti Kordero. Adda arpa ti tunggal maysa ken balitok a malukong a napno iti insenso nga isu dagiti karkararag dagiti tattao ti Dios.

⁹ Kinantada ti maysa a baro a kanta: “Maikarika a mangala iti nalukot a pagbasaan Ken mangikkat kadagiti timbre. Ta napapatayka ket babaen iti ipapataymo, sinubbotmo dagiti tattao a maipaay iti Dios, Manipud iti tunggal tribu, pagsasao, nasion ken puli,

¹⁰ Pinagbalinmo ida a pagarian tapno agserbida a kas papadi iti Diostayo; Ket agturaydanto ditoy daga.”

¹¹ Kimmitaak manen, ket nangngegko ti ragup a timek dagiti rinibu ken riniwriw nga angheles. Linawlawda ti trono, dagiti sibibiag a parsua ken dagiti panglakayen,

¹² ket inkantada iti napigsa: “Maikari ti napapatay a Kordero, Wen, maikari nga umawat iti pannakabalin, kinabaknang, kinasirib ken kinapigsa, Dayaw, dayag ken pannakaitan-ok!”

¹³ Ket nangngegko nga agkankanta dagiti amin a parsua sadi langit, dagiti adda ditoy daga, dagiti adda iti uneg ti daga, dagiti adda iti taaw—amin a parsua iti entero a lubong: “Iti situtugaw iti trono ken iti Kordero, Maited koma ti tan-ok ken dayaw, dayag ken pannakabalin Iti agnanayon nga awan inggana!”

¹⁴ “Amen,” insungbat dagiti uppat a sibibiag a parsua. Ket nagparintumeng dagiti panglakayen sada nagdaydayaw.