Paltiing 16 - Ti Baro a Naimbag a Damag Biblia

Dagiti Malukong ti Pungtot ti Dios

¹ Manipud iti templo, nakangngegak iti napigsa a timek a mangbilbilin kadagiti pito nga angheles: “Inkay ibuyat iti daga dagiti linaon dagiti pito a malukong ti napalalo a pungtot ti Dios.”

² Napan imbuyat ti umuna nga anghel ti linaon ti malukongna iti daga. Gapu iti daytoy, nagtaud dagiti nakabutbuteng ken naut-ot a gaddil kadagiti tattao nga addaan iti marka ti narungsot nga animal, ken kadagiti nagdaydayaw iti ladawanna.

³ Imbuyat ti maikadua nga anghel ti linaon ti malukongna iti taaw. Nagbalin ti danum a kasla dara ti natay a tao ket natay dagiti amin a sibibiag a parsua iti taaw.

⁴ Imbuyat met ti maikatlo nga anghel ti malukongna kadagiti karayan ken ubbog, ket nagbalinda met a dara.

⁵ Nangngegko ti kuna ti anghel a mangay-aywan iti danum: “Nalinteg ti panangukommo, O Nasantoan, Sika nga adda ita ken sika nga adda idi;

⁶ Imparukpokda ti dara dagiti tattao ti Dios, Ken ti dara dagiti profeta, Isut' gapuna a pinainummo ida iti dara. Lak-amenda ti kaikarianda a dusa.”

⁷ Nangngegko ti timek a naggapu iti altar: “Apo Dios a Mannakabalin-amin, awan duadua a napudno ken nalinteg dagiti panangukommo!”

⁸ Kalpasanna, imbuyat ti maikapat nga anghel ti malukongna iti init, ket napalubosan a mangpuor kadagiti tattao.

⁹ Mapupuoran la ngaruden dagiti tattao, ilunlunodda pay laeng ti nagan ti Dios nga adda pannakabalinna kadagitoy a didigra idinto nga agbabawida koma kadagiti basbasolda ket agdaydayawda iti dayagna.

¹⁰ Imbuyat met ti maikalima nga anghel ti malukongna iti trono ti narungsot nga animal. Nagsipnget ti entero a pagarian ti animal. Kinagat dagiti tattao dagiti bibigda gapu iti rigat.

¹¹ Inlunodda ti Dios sadi langit gapu kadagiti ut-ot ken gaddilda. Ngem saanda a nagbabawi kadagiti dakes nga aramidda.

¹² Imbuyat ti maikanem nga anghel ti malukongna iti dakkel a karayan Eufrates. Namagaan ti karayan tapno adda pagnaan dagiti ari nga aggapu iti daya.

¹³ Ket nakakitaak iti tallo a narugit nga espiritu a kasla tukak a rumrummuar kadagiti ngiwat ti dragon, ti narungsot nga animal ken ti sinan-profeta.

¹⁴ Isuda dagiti espiritu ti demonio nga agiparparang iti pagilasinan. Mapan dagiti tallo nga espiritu kadagiti ari iti sangalubongan tapno ummongenda ida a makigubat inton dumteng ti naindaklan nga aldaw ti Mannakabalin-amin a Dios.

¹⁵ “Denggenyo, umayak a kasla mannanakaw! Nagasat ti tao a siririing ken di manguksob iti pagan-anayna tapno saan a lamolamo a magna ken saan a mabain kadagiti tattao.”

¹⁶ Ket inummong dagiti espiritu dagiti ar-ari sada impan ida iti lugar a maaw-awagan Armagedon iti pagsasao a Hebreo.

¹⁷ Kalpasanna, imbuyat ti maikapito nga anghel ti malukongna iti angin. Adda napigsa a timek a naggapu iti trono iti templo. “Nalpasen!” kinunana.

¹⁸ Nagkimatkimat, rimkuas dagiti dulluog ken gurruod ken nagginggined iti napigsa. Daytoy ti kapigsaan a ginggined manipud pannakaparsua ti tao. Wen, nakapigpigsa!

¹⁹ Nadadael a nagkatlo ti dakkel a siudad, ket narba dagiti siudad iti amin a pagilian. Saan a nakalisi ti agdindinamag a Babilonia iti pannusa ti Dios; impainumna kenkuana ti arak iti kopana—ti arak ti nakaam-amak a pungtotna.

²⁰ Limned amin a purpuro ken bambantay.

²¹ Manipud langit, nagtudo iti dadakkel nga yelo—aglimapulo a kilo ti dagsen ti tunggal maysa—ket natupakan dagiti tattao. Inlunod dagiti tattao ti Dios gapu iti daytoy a didigra, ta nakabutbuteng unay.