Paltiing 11 - Ti Baro a Naimbag a Damag Biblia

Dagiti Dua a Saksi

¹ Naikkanak iti pagrukod a kasla baston, ket naibaga kaniak: “Inka rukoden ti templo ti Dios ken ti altar, ken bilangem dagiti agdaydayaw sadiay.

² Ngem dimo rukrukoden ti akinruar a paraangan ti templo agsipud ta naited daytoy kadagiti pagilian—baddebaddekandanto ti Nasantoan a Siudad iti las-ud ti tallo ket gudua a tawen.

³ Nupay kasta, ikkakto ti pannakabalin dagiti dua a saksik a nakakawes iti nakersang a lupot ket ipakaammodanto ti mensahe ti Dios iti uneg ti 1,260 nga aldaw.”

⁴ Dagiti dua a saksi isuda dagiti dua a puon nga olibo ken dagiti dua a pagsilawan iti sangoanan ti Apo ti entero a daga.

⁵ No adda mangranggas kadakuada, rummuar ti apuy iti ngiwatda ket dadaelenda dagiti kabusorda. Kasta ti pannakapapatay ti siasinoman nga agpanggep a mangranggas kadakuada.

⁶ Adda pannakabalinda a mangirikep iti langit tapno saan nga agtudo bayat ti panangipakaammoda iti mensahe ti Dios. Adda met pannakabalinda a mamagbalin a dara kadagiti ubbog. Adda pay pannakabalinda a mangyeg iti amin a kita ti didigra iti daga tunggal kayatda nga aramiden ti kasta.

⁷ Inton maipakaammo dagiti dua a saksi ti mensaheda, rummuarto ti narungsot nga animal iti nakaun-uneg a yuyeng tapno gubatenna ida. Parmeken ken papatayennanto ida.

⁸ Maiwalangto dagiti bangkayda iti kangrunaan a kalsada ti dakkel a siudad. Sodoma wenno Egipto ti naespirituan a naganna. Ditoy met a lugar ti nakailansaan ti Apoda iti krus.

⁹ Iti uneg ti tallo ket gudua nga aldaw, buybuyaento dagiti tattao iti amin a nasion, tribu, pagsasao ken puli dagiti bangkayda, ket didanto ipalubos a maitanemda.

¹⁰ Maragsakanto dagiti tattao ditoy daga gapu iti ipapatay dagitoy dua. Agrarambak ken agririnnegalodanto agsipud ta natayen dagiti dua a profeta a nangyeg iti adu a panagsagaba iti sangkataoan.

¹¹ Ngem kalpasan ti tallo ket gudua nga aldaw, pinagungar ida ti Dios ket timmakderda. Kasta unay ti buteng dagiti nakaimatang kadakuada.

¹² Kalpasanna, nangngeg dagiti dua a profeta ti maysa a napigsa a timek a naggapu sadi langit. “Umulikayo ditoy!” kinunana kadakuada. Ket bayat ti panangkita kadakuada dagiti kabusorda, naipangatoda sadi langit babaen iti maysa nga ulep.

¹³ Iti dayta met la a kanito, nagginggined iti napigsa. Nadadael ti apagkapullo a paset ti siudad ket 7,000 a tattao ti natay. Nagbuteng dagiti tattao a nabati ket nagdaydayawda iti Dios sadi langit.

¹⁴ Nakalabasen ti maikadua a nakabutbuteng a didigra. Ngem kitaem, umayen ti maikatlo.

Ti Maikapito a Trumpeta

¹⁵ Pinuyot ti maikapito nga anghel ti trumpetana. Adda dagiti napipigsa a timek a naggapu sadi langit a kunkunada, “Naiteden iti Apotayo ken iti Cristona ti pagarian ti lubong, ket agturayto iti agnanayon nga awan inggana!”

¹⁶ Nagpakleb dagiti duapulo ket uppat a panglakayen a situtugaw iti tronoda iti sangoanan ti Dios ket nagdaydayawda kenkuana

¹⁷ a kunkunada: “Apo Dios a Mannakabalin-amin, Dioska ita ken Dioska idi: Agyamankami ta inaramatmo ti dakkel a pannakabalinmo Ket inrugimon ti agturay!

¹⁸ Nakaunget dagiti pagano, Ta dimtengen ti tiempo ti pungtotmo, Ken ti pannakaukom dagiti natay. Tiempon a gunggonaam dagiti profeta nga adipenmo, Kadagiti amin a tattaom, ken amin nga agbuteng kenka, Natan-ok man ken nanumo, Tiempon a dadaelem dagiti nangparigat iti daga!”

¹⁹ Nalukatan ti templo ti Dios sadi langit, ket nakitak ti Lakasa ti Tulagna iti uneg. Kalpasanna, nagkimat, adda napigsa nga arimbangaw, naggurruod, nagginggined ken nagtudo iti nakaad-adu nga yelo.