Oseas 14 - Ti Baro a Naimbag a Damag Biblia

Ti Isusubli ti Israel ken ni Yahweh

¹ Tattao ti Israel, agsublikayo iti Apo a Diosyo. Naitibkol ken natnagkayo gapu iti basolyo.

² Agsublikayo iti Apo ket yebkasyo daytoy a kararag a kas datonyo kenkuana: “Pakawanem koma dagiti basbasolmi ken ipangagmo koma ti kararagmi ket idaydayawdaka kas inkarimi.

³ Dinakami maisalakan ti Asiria, ket dinakami masalakniban dagiti kabalio a pakigubat. Dimi awaganen a diosmi dagiti imahen nga aramid dagiti imami. O Apo, kaasiam dagiti awan sabali a pagkamanganda.”

Baro a Biag para iti Israel

⁴ Kuna ti Apo, “Pakawanekon dagiti tattaok Ayatek ida iti amin a pusok ta nagbaawen ti pungtotko kadakuada.

⁵ Linnaaw ti arigkonto kadagiti tattao ti Israel agsabongdanto a kas iti lirio. Agramutto a kas kadagiti kayo iti Libano.

⁶ Rumangpayanto dagiti sangada. Napintasdanto a kas iti kayo ti olibo. Agayamuomto ti bangloda, kas kadagiti sedro iti Libano.

⁷ Agnaeddanto manen iti salinongko. Lumangtodanto a kas iti minuyongan. Agsabongdanto a kas iti ubas. Agayamuomdanto a kas iti arak ti Libano.

⁸ Ania pay la ti pakasapulan dagiti tattao ti Israel kadagiti didiosen idinto a siak ti mangted iti dawatda ken mangaywan kadakuada? Siak ti saleng a salinongda. Siak ti pagtaudan ti amin a bendisionda.”

Paggibusan

⁹ Awaten koma dagiti masirib dagiti naisurat ditoy, ket ammoenda ti kaipapananda. Ngamin, nalinteg dagiti wagas ni Yahweh, ket suroten dagiti nalinteg ti panagbiagna ngem saan nga ikankano dagiti managbasol isu a maitibkol ken matnagda.